Një vit i funksionimit të suksesshëm të Shtetit

Presidenti Fatmir Sejdiu, në fjalimin e tij vjetor në Kuvendin e Kosovës, duke folur për aktivitetet e tij politike e diplomatike gjatë një viti, ka vlerësuar se kemi lënë prapa një vit të mbarë të dëshmimit, vit të funksionimit të suksesshëm dhe të rritës së përgjithshme të Republikës sonë të pavarur dhe demokratike.

Republika e Kosovës – sipas presidentit Sejdiu – ka pasur gjatë këtij viti arritje që mund të vërehen në të gjitha fushat e jetës. Ai ka vlerësuar se, institucionet e vendit, në të gjitha nivelet, janë forcuar, është shtuar përgjegjësia, është dinamizuar jeta dhe debati demokratik dhe për këtë merita kanë të gjithë, edhe ata që aktualisht janë bartës së qeverisjes, edhe ata që janë në opozitë, por që kanë ndikuar drejtpërdrejt në shtimin e përgjegjësisë së qeverisjes.

Presidenti Sejdiu ka folur për njohjet e Kosovës nga 61 shtete botërore, pastaj, krijimin e institucioneve të reja, konsolidimin e atyre ekzistues, vizitat e tij jashtë vendit, anëtarësimin e Kosovës në FMN dhe BB, korrespodencën që ka mbajtur me homologët e tij nga rajoni dhe bota, si dhe arritjes që vendi ynë të dëshmohet si faktor i paqes dhe stabilitetit në rajon.

Sejdiu ka lavdëruar pozicionin që po merr Kosova si një shtet i respektuar në rajon, ndërkaq tha se edhe me Serbinë do të ketë raporte të mira, atëherë kur ky vend të pushojë me politikat destruktive ndaj Kosovës dhe minoritetit serb.

Në planin e brendshëm, Sejdiu ka kërkuar nga qeveria përkujdesje më të madhe për kategoritë e rrezikuara sociale, si dhe angazhime më të mëdha për të përmirësuar gjendjen në arsim, shëndetësi e fusha të tjera. /Telegrafi/