Nga nesër fillon mësimi në distancë për klasat 1-5, do të transmetohet në TV

Ministrja e Arsimit, Shkencës dhe Teknologjisë, Hykmete Bajrami, ka mbajtur sot një konferencë për media pas përhapjes së coronavirusit në Kosovë.

Për shkak të mbylljes së shkollave, Bajrami ka bërë të ditur se nga nesër mësimi për klasat 1 deri në 5, do të transmetohet në Radio Televizionin e Kosovës.

“Që nga nesër fillon mësimi në distancë, fillimisht në gjuhë shqipe dhe matematikë, për klasat 1 deri 5, mësim ky i cili do të transmetohet në RTK1 dhe RTK4. Në të njëjtën kohë jemi duke punuar në dy platforma në njërën do t’i vëmë në disponim të gjitha xhirimet, të cilat fillimisht do të transmetohen në RTK dhe do të jenë të disponueshme për mësimdhënësit, nxënësit dhe prindërit gjatë gjithë kohës. Për adresa do t’ju njoftojmë sapo t’i kemi funksionale këto platforma dhe me një platformë tjetër do të vëmë në disponim të gjitha përmbajtjet e tjera si mësim alternativ, të ofruar nga operatorë privatë në gjuhë të ndryshme”, tha Bajrami.

Kosova sot ka shënuar rastin e parë fatal me coronavirus, derisa janë gjithsej 31 raste të konfirmuara deri më tash me të prekur nga kjo sëmundje e rrezikshme, ndërkohë që pandemia tashmë ka përfshirë të gjitha kontinente në botë, me përjashtim të Antarktikut./Telegrafi/