Në Moskë, ‘Big Brother’ po vëzhgon dhe identifikon protestuesit kundër Putinit

Zyrtarët vlerësuan rrjetin masiv të kamerave të njohjes së fytyrës në Moskë si një ndihmë për banorët që do të zbatonte kufizimet e karantinës, do të kapte kriminelët dhe madje do t’i bënte të paguanin tarifat e metrosë.

Dhe sipas Bloomberg, përcjell Telegrafi, ato tani po vendosen për të “shtypur” ata që nuk pajtohen me presidentin Vladimir Putin.

Sipas mediumit në fjalë, policia përdor sistemin e mbikëqyrjes për të identifikuar dhe ndaluar dhjetëra njerëz që morën pjesë në protestat e javës së kaluar në kryeqytetin rus në mbështetje të Alexey Navalny.

Dhe si pasojë, më shumë se 50 njerëz u morën gjatë ditëve në vijim, duke përfshirë disa gazetarë, sipas OVD-Info, një grup i pavarur i monitorimit të të drejtave të njeriut që mbledh informacion mbi arrestimet.

Anna Borzenko, 65, u mbajt brenda natës në një qeli pasi shkoi në polici ku mësoi se oficerët kishin qenë në banesën e saj duke kërkuar ta pyesnin.

“Unë isha një eksperiment në zhvillimin e një sistemi të mbikëqyrjes totale”, tha ajo. “Ky sistem do të jetë më tmerrues kur të vendoset”.

Siç vlerëson Bloomberg, përdorimi i kësaj teknologjie shton rreziqet me të cilat përballen rusët që shprehin kundërshtim ndaj Putinit ndërsa Kremlini ndërmerr një goditje më të gjerë në vite.

Me Navalny të izoluar në një burg jashtë Moskës, dhe të dobësuar fizikisht pas një greve urie 24-ditore, mbështetësit e tij po përballen me veprime ligjore për t’i parandaluar ata nga organizimi kundër autoriteteve.

Hetimet madje po shtrihen tek avokatët dhe mjekët që ofrojnë ndihmë profesionale për aktivistët e opozitës, një zhvillim i ri që po acaron edhe më tej mospajtimin përpara zgjedhjeve kryesore parlamentare në shtator.

“Autoritetet po ndryshojnë taktikat e tyre: ata janë bërë më të zgjuar, më shtypës dhe më selektivë”, tha Tatyana Stanovaya, themeluese e konsulencës politike R.Politik. “Pjesëmarrësit gjurmohen përmes kamerave të sigurisë, sistemeve të njohjes së fytyrës, aktivitetit të mediave sociale dhe faturimit të telefonit”.

E zëdhënësi i Kremlinit, Dmitry Peskov, mohoi të ketë pasur një goditje të gjerë, duke thënë se lëvizjet kundër aktivistëve ishin incidente të izoluara.

Ndërsa përdorimi i teknologjisë së njohjes së fytyrës është më i përhapur në Kinë, e cila ka krijuar një sistem të gjerë mbikëqyrjeje për të monitoruar popullatën ujgure në rajonin e saj Xinjiang, Kremlini ka rritur përpjekjet për të zhdukur kundërshtimin që kur Putini bëri ndryshimet kushtetuese vitin e kaluar që lejojnë ai të mbetet potencialisht në pushtet deri në vitin 2036. /Telegrafi/