Ndihma amerikane, kontribut i konsiderueshëm në hetimin e 21 janarit

Zyra e Komisionerit për të Drejtat e Njeriut të Këshillit të Evropës njoftoi se duhet një hetim tërësor, i paanshëm dhe i besueshëm mbi shkeljet e të drejtave të njeriut që ndodhën në Tiranë më 21 janar.

Komisioneri Thomas Hammarberg tha të martën në prezantimin e raportit të posaçëm në Tiranë se “është e domosdoshme që personat përgjegjës për aktet e dhunshme të japin llogari për to”. “Kjo është e rëndësishme si për të vendosur drejtësinë ashtu edhe për të parandaluar dhunën në lidhje me demonstratat dhe protestat politike në të ardhmen”, deklaroi Hammarberg.

Ai mirëpriti faktin që grupimet kryesore politike i deklaruan se Prokuroria e Përgjithshme është organi përgjegjës për hetimet, por vuri në dukje se ka pasur deklarata publike kritike kundër Prokurores së Përgjithshme.

Komisioneri u takua me përfaqësues kryesorë të klasës politike dhe institucioneve dhe u befasua nga polarizimi i skajshëm që ekziston në Shqipëri.

Të dy grupimet politike dhanë përshkrime jashtëzakonisht të ndryshme mbi atë çka ndodhi më 21 janar. “Polarizimi i skajshëm politik e bën veçanërisht të vështirë dhe delikate detyrën e Prokurorisë së Përgjithshme. Është e rëndësishme që gjithsecili të shmangë ndërhyrjet në hetimet që kanë nisur dhe që autoritetet përkatëse, duke përfshirë dhe policinë, të bashkëpunojnë në mënyrë te plotë dhe në kohën e duhur me prokurorinë”, theksoi komisioneri Hammarberg.

Ai gjithashtu vërejti se asistenca teknike e ofruar nga autoritetet e SHBA-ve ndaj Prokurorisë së Përgjithshme duket se ka pasur kontribut të konsiderueshëm. Ai sugjeroi në raportin e tij që bashkësia ndërkombëtare të vazhdojë t’u përgjigjet pozitivisht kërkesave për asistencë në këtë kontekst. /Telegrafi/