“Na solli fat” – tifozët e Celticut pëlqejnë dhe shpërndajnë videon e Metës

Tifozët skocezë të Celticut kanë komentuar në profilin zyrtar në Twitter të presidentit të Shqipërisë, Ilir Meta, pasi e kanë cilësuar fatsjellës takimin me të në kryeqytetin e Bosnje Hercegovinës pak orë para ndeshjes ndërmjet FK Sarajevës dhe Celticut.

Kreu i shtetit shqiptar pati një takim rastësor, por mjaft të ngrohtë dhe të përzemërt me tifozët skocezë në rrugët e Sarajevës në orët para sfidës. I entuziazmuar nga kjo atmosferë, Meta nuk nguroi të postonte një video në profilin e tij në Twitter, teksa këndonte me skocezët duke e shoqëruar me statusin: “Kur festa të rrëmben! Momente të jashtëzakonshme në Sarajevë me tifozët e Celtic FC, para ndeshjes së turit të parë kualifikues të Ligës së Kampionëve. Nuk mungoi një shëndet për Rudi Vata, yllin e Kombëtares sonë dhe të Celtic FC”.

When you get carried away by the #PartyAtmosphere!😁 #Extraordinary moments today in #Sarajevo with @CelticFC🍀fans, before the first qualifying round of @ChampionsLeague. There was also a toast for #RudiVata, our #NationalTeam🇦🇱⚽ and @CelticFC🍀star. pic.twitter.com/KObYIpn33H

— Ilir Meta (@ilirmetazyrtar) July 9, 2019

Skuadra e famshme skoceze mori një fitore të vyer mbrëmë në udhëtimin e Sarajevës me rezultatin 3-1 dhe pas triumfit të shumtë kanë qenë tifozët skocezë të cilët kanë nxituar të falënderojnë presidentin Meta për urimin, teksa e kanë cilësuar fatsjellës takimin me të.

Në postimin në fjalë vihen re mijëra pëlqime dhe qindra shpërndarje të videos, që aktualisht ka dhjetëra mijëra shikime. Madje, ka pasur edhe një rritje të ndjekësve të Metës në Twitter. Kuptohet që pjesa dërrmuese e këtyre reagimeve vinin nga Skocia.

Gjithashtu edhe media zyrtare e klubit skocez të Celticut i ka bërë jehonë ngjarjes së ditës së djeshme, ku presidenti i Shqipërisë ka ndarë disa momente argëtuese me tifozët që kishin udhëtuar në Bosnjë për të ndjekur ekipin e tyre të zemrës.

Faqja zyrtare e tifozëve të Celticut, Celtsarehere.com, e ka cilësuar si ditë befasuese dhe të shkëlqyer atë të djeshmen, ku Presidenti po u fliste atyre për ish-futbollistin e Celtic FC dhe shokun e tij shqiptar, Rudi Vata.