Ministria e Shëndetësisë sqaron procesin e vaksinimit për personat mbi 80 vjeç

Ministria e Shëndetësisë ka kërkuar nga qytetarët e moshës mbi 80 vjeç, që të mos drejtohen në qendrën e vaksinimit në sallën “1 tetori” në Prishtinë dhe qendrat tjera të vaksinimit, por të presin ftesat për vaksinim.

MSH thotë se fillimisht do të vaksinohen profesionistët shëndetësor, pastaj personat e moshës mbi 80 vjeç, transmeton Telegrafi.

“Me qëllim të mbarëvajtjes së procesit të vaksinimit kundër COVID-19 dhe lehtësimit të qasjes në këtë proces, sidomos për grupet prioritare që do të vaksinohen me dozat e para të vaksinës kundër COVID-19, Ministria e Shëndetësisë u bën thirrje personave të moshës mbi 80 vjeçare dhe atyre me sëmundje kronike, që të presin thirrjen për vaksinim nga njësitë e vaksinimit dhe mos të drejtohen në qendrën e vaksinimit në sallën ‘1 Tetori’ në Prishtinë dhe në qendrat e tjera të vaksinimit, para se të marrin ftesën për marrje të vaksinës.Të parët që do të vaksinohen, sikur është bërë e ditur, janë të gjithë profesionistët shëndetësor, ndërsa menjëherë pas tyre, do të vaksinohen grupet e tjera sipas Planit shtetëror të vaksinimit kundër COVID-19, përfshirë personat e moshës mbi 80 vjeçare”, thuhet në sqarimin e MSH-së.

Tutje, MSH ka dhënë detaje rreth vaksinimit të kësaj grup moshe.

“Personat e moshuar dhe ata me sëmundje kronike do të kontaktohen nga njësitë e vaksinimit në çdo komunë për t’u vaksinuar, sipas listave të siguruara nga institucionet e vendit, derisa për t’u siguruar përfshirja e plotë e tyre në lista, gjatë ditës së nesërme, në dispozicion të qytetarëve do të jetë edhe një platformë elektronike, krahas regjistrimit klasik.Prandaj, me mirëkuptimin e plotë, MSh u bën thirrje personave të moshuar, që të presin thirrjet për vaksinim dhe të veprojnë sipas udhëzimeve që do t’i marrin gjatë gjithë procesit të vaksinimit të tyre kundër COVID-19”, sqaron MSH.

Ndryshe, kryeministri i Kosovës, Albin Kurti ka qenë i pari që ka marrë vaksinën kundër COVID-19.

Kosova, të dielën mbrëma, ka pranuar 24,000 doza të vaksinës AstraZeneca.

Këto dërgesa, të parat për Kosovën, janë siguruar nga programi COVAX i Organizatës Botërore të Shëndetësisë, i cili synon furnizimin me vaksina të vendeve në zhvillim.

Fushata e vaksinimit në Kosovë pritet të nisë të martën.

Kosova ka regjistruar mbi 88,000 raste me coronavirus. Aktualisht, aktive janë mbi 13,000. /Telegrafi/