Medvedev: Jo zgjidhjes së konflikteve jashtë KB-së

Tentimet që konfliktet ndërkombëtare të zgjidhen jashtë Kombeve të Bashkuara, siç ishte rasti me Kosovën, janë joproduktive dhe nuk kontribuojnë në arritjen e paqes dhe stabilitetit, ka vlerësuar presidenti i ardhshëm i Rusisë, Dmitry Medvedev, gjatë takimit që ka zhvilluar të mërkurën me sekretarin e përgjithshëm të Kombeve të Bashkuara, Ban Ki-Moon.

"Tentimet për zgjidhjen e çështjeve ndërkombëtare, që nuk janë në pajtim me rezolutat e KB-së – siç ishte rasti me Kosovën dhe disa çështjet të tjera aktuale – janë kundër-produktive dhe fatkeqësisht, nuk kontribuojnë në arritjen e paqes dhe stabilitetit”, ka thënë Medvedev.

Presidenti i ardhshëm i Rusisë, i cili në këtë post do të zëvendësojë Vladimir Putinin më 7 maj, ka thënë se janë të pabaza tezat për krizën në Kombet e Bashkuara dhe ka shtuar se Rusia mbështet këtë organizatë botërore.

"KB në çfarëdo mënyre duhet të mbajë dhe zhvillojë terrenin për harmonizimin e interesave”, ka thënë Medvedev, duke shtuar se Rusia, si anëtare e përhershme e Kombeve të Bashkuara, niset nga parimi se nuk ka forume të tjera universale për harmonizimin e interesave të pjesëmarrësve në jetën politike dhe në zgjidhjen e çështjeve të rëndësishme që kanë të bëjnë me funksionimin e rendit modern botëror.

Medvedev ka thënë se asnjë shtet nuk është në gjendje që i vetëm t’i zgjidh problemet ndërkombëtare.

Nga ana tjetër, sipas mediave ruse, sekretari i përgjithshëm i Kombeve të Bashkuara, Ki-Moon ka thënë se Rusia është një prej pjesëmarrësve më të rëndësishëm në Organizatën Botërore dhe anëtare e përhershme e Këshillit të Sigurimit dhe se ai e vlerëson shumë “partneritetin e fuqishëm”.

Sekretari Ban Ki-Moon gjendet për një vizitë treditore në Rusi, ndërsa sipas paralajmërimeve ai do të takohet edhe me presidentin aktual rus, Vladimir Putin. /Telegrafi/