Mediumi britanik: Ukrainës do t’i thuhet se është shumë e korruptuar për t’u bashkuar me NATO-n

Ukrainës do t’i thuhet se aktualisht është shumë e korruptuar për t’u bashkuar me NATO-n.

Aleanca do të kërkojë “hapa shtesë” nga Kievi përpara përparimit të bisedimeve të anëtarësimit, tha një zyrtar i lartë në Departamentin e Shtetit të SHBA, shkruan mediumi britanik The Telegraph.

Sipas mediumit në fjalë, qëndrimi do të prezantohet me shkrim në komunikatën e NATO-s që do të nënshkruhet në samitin vjetor të aleancës më 9 korrik.

“Ne duhet të tërhiqemi dhe të duartrokasim gjithçka që Ukraina ka bërë në emër të reformave gjatë dy viteve të fundit”, tha zyrtari për The Telegraph.

“Ndërsa ata vazhdojnë t’i bëjnë ato reforma, ne duam t’i përgëzojmë, duam të flasim për hapa shtesë që duhet të ndërmerren, veçanërisht në fushën e anti-korrupsionit. Është një prioritet për shumë prej nesh rreth tryezës”, ka shtuar burimi.

Zelensky, presidenti i Ukrainës, po bën presion për anëtarësim të shpejtë në NATO pas përfundimit të luftës për t’u mbrojtur nga pushtimi i ardhshëm.

Kjo do t’i detyronte SHBA-të dhe Evropën të dilnin në mbrojtje të Kievit në rast të ndonjë sulmi rus.

Por korrupsioni ka qenë një pikë pengese në bisedimet e fundit midis vendeve anëtare të NATO-s nëse do t’i ofronin Ukrainës një afat konkret për t’u bashkuar me aleancën ushtarake perëndimore, vë në pah The Telegraph.

Sipas mediumit në fjalë, Ukraina ka vuajtur nga korrupsioni, veçanërisht në forcat e saj të armatosura, që nga shpërbërja e Bashkimit Sovjetik.

Dhe Zelensky ka shkarkuar shefat ushtarakë si pjesë e një përpjekjeje për të frenuar problemin, veçanërisht në fushën e prokurimit të mbrojtjes.

Kështu, diplomatët dhe zyrtarët e NATO-s i kanë dhënë Ukrainës një listë të reformave që pritet të kryejë përpara se të realizohen ambiciet e saj për anëtarësim, tha një zyrtar amerikan i mbrojtjes. /Telegrafi/