Veturat e konfiskuara në Belgjikë – nuk do të shkojnë në Rusi, por do të shiten në shtete të tjera

Për shkak të sanksioneve të vendosura ndaj Rusisë, më shumë se 8000 vetura të reja luksoze janë parkuar në portin e Zeebrugge në Belgjikë për gati një muaj.

Sipas mediave të huaja, bëhet fjalë për vetura luksoze, të cilat kanë mbërritur me rrugë detare nga Azia në fillim të prillit dhe është dashur të ringarkohen dhe të transportohen në Rusi.

Mirëpo, ndërkohë janë vendosur sanksione më të rrepta, duke ndaluar eksportin e automjeteve me vlerë mbi 50 mijë euro. Pasoja është se shumë vetura të shtrenjta mbetën të bllokuara në Belgjikë.

Bëhet fjalë për një seri modelesh luksoze, nga Cadillac amerikan dhe Lexus japonez e deri te premiumet gjermane të udhëhequra në Rusi nga Mercedesi veçanërisht i dëshirueshëm. Përveç veturave, në port ka edhe mallra të tjera që kanë mbetur të bllokuara për shkak të sanksioneve. Rreth 1100 kontejnerë për në Rusi janë ndalur deri më tani, thonë burime të paidentifikuara nga administrata e portit.

Kur bëhet fjalë për veturat, supozohet se ato do të transportohen në tregje të tjera. “Veturat ndoshta do të qëndrojnë këtu derisa të gjejnë blerës në tregje të tjera. Ne nuk e dimë se kush janë blerësit në Rusi ose cilët ata zotërojnë aktualisht. Këtu ka vend për 10 mijë automjete”, tha Marc Adriansens, drejtor i terminalit të transportit të portit.

Zeebrugge është një nga portet më të mëdha për transportin dhe transferimin e automjeteve me një xhiro vjetore deri në dy milionë automjete dhe një vend parkimi për 210 mijë automobila. /Telegrafi/