Mashtrojnë qytetarët lidhur me dokumentacionin për të punuar jashtë vendit, arrestohen dy të dyshuar

Njësiti i Hetimeve të Përgjithshme në Prishtinë, ka arrestuar sot B. K. (29) dhe B. E. (33), shtetas të Kosovës, nën dyshimin se kanë marrë nga persona të ndryshëm shuma të caktuara parash në total prej rreth 10.000 eurosh, duke u premtuar se do t’ua rregullojnë dokumentet për punësim jashtë vendit.

Sipas njoftimit për media, mbështetur në rezultatet e para të hetimeve, policia ka ngritur dyshimin e bazuar se mashtrimi mund të ketë ndodhur në vazhdimësi për një periudhë të gjatë kohore dhe dyshohet se numri i personave të mashtruar mund të jetë më i madh.

“Deri tani në polici si viktima të këtij mashtrimi janë paraqitur 5 persona, andaj Policia e Kosovës kërkon nga qytetarët që mund të kenë qenë viktimë e rasteve të tilla, të lajmërohen në stacionin më të afërt policor për të ndihmuar policinë drejt hetimit përfundimtar. Pas arrestimit dhe marrjes së autorizimit nga ana e prokurorit, personat e dyshuar janë dërguar në qendrën e mbajtjes në Prishtinë, ku aktualisht hetuesit po kryejnë veprimet e nevojshme hetimore e procedurale, para se rasti të kalojë në institucionet kompetente”, thekson njoftimi.

Ndryshe deputetja shqiptare në parlamentin kroat, Ermina Lekaj-Përlaskaj, në emisionin ”Përballje” me gazetarin Muhamet Hajrullahu u ka bërë thirrje kosovarëve të cilët duan të shkojnë në Kroaci për të punuar, të kenë kujdes se me kënd lidhin kontratë pune, pasi që sipas saj po bëhen manipulime të shumta.

Ajo pati thënë se 3 mijë punëtorë nga Kosova kanë shkuar në Kroaci me kontrata dhe leje pune./Telegrafi/