Maqedonia dhe Bullgaria nënshkruan disa marrëveshje për bashkëpunim

Përfaqësues të Qeverive të Maqedonisë dhe të Bullgarisë në kuadër të seancës së sotme të përbashkët në Strumicë nënshkruan disa marrëveshje për bashkëpunim në shumë sfera.

Ministrat e mbrojtjes të Maqedonisë dhe të Bullgarisë, Radmilla Sheqerinska dhe Krasimir Karakaçanov nënshkruan protokoll për bashkëpunim në trajnimet e zbatuara për pjesëtarët e ARM-së në shkollat ushtarake në Bullgari, përcjell Telegrafi Maqedoni.

Protokolli parasheh trajnim praktik të ekuipazheve të tankeve në Bullgari, si dhe masa të tjera konkrete për intensifikimin e bashkëpunimit në mbrojtje.

Maqedonia dhe Bullgaria sot me memorandum e zyrtarizuan edhe paralajmërimin për uljen e tarifave ndërkombëtare për roaming në shërbimet e telekomunikimit.

Memorandumin e nënshkruan ministri i Maqedonisë i Shoqërisë Informatike dhe Administratës, Damjan Mançevski dhe ministri bullgar i Transportit dhe Teknologjive informatike, Ivajlo Moskovski gjatë seancës së sotme të përbashkët të qeverive të dy shteteve që u mbajt në Strumicë, në prani të kryeministrave Zoran Zaev dhe Bojko Borisov.

Ministrja bullgare e Turizmit, Nikolina Angelova dhe zëvendësministri i Maqedonisë i Ekonomisë Kire Naumov, nënshkroi Marrëveshje për bashkëpunim në turizëm.

Në Strumicë janë nënshkruar edhe marrëveshje për bashkëpunim me sektorin energjetik.

Me to parashihet nga fillimi i vitit 2018 vendosja e tregut të përbashkët për sistemimin e kapaciteteve përçuese midis operatorëve elektroenergjetik të të dyja vendeve.

Ndërsa, Agjencitë për Kadastër të të dyja vendeve, nënshkruan marrëveshje për këmbimin e materialeve kartografike dhe gjeodezike dhe informacioneve./Telegrafi/