Majlinda niset per Paris

Fillon aventura e Majlinda Kelmendit për këtë vit. Xhudistja më e suksesshme kosovare të enjten ka udhëtuar për në Paris të Francës, aty ku në fundjavë do garojë në kuadër të turneut Grand Slam ‘Paris 2014’.

Majlinda ka udhëtuar në kryeqytetin francez bashkë me trajnerin e saj, Driton Kuka, si dhe xhudisten tjetër, Distria Krasniqi, e cila pas suksesit të fundit në Kupën Botërore ‘European Open’ të mbajtur në Bullgari, do të mëtoj suksesin e radhës në kategorinë e saj të re, -48 kg.

Dy xhudistet kosovare synojnë që në Kupën Botërore në Paris të shtojnë pikët e tyre në ranglistën botërore, me Distrian e cila tani ka 100 të tilla në kategorinë e re, pasi fitoi medaljen e artë në Bullgari.

Ndryshe, Majlinda ishte pjesëmarrëse e këtij Grand Slami edhe vitin e kaluar, duke e fituar medaljen e argjendtë. Ajo u mposht nga japonezja, Juki Hashimoto në finale. Gjithsesi, disa muaj më vonë, Kelmendi u bë mbretëreshë e botës në kategorinë -52 kg, duke e fituar medaljen e artë në Botërorin e mbajtur në Rio të Brazilit, duke arritur njëherësh suksesin më të madh të një olimpisti në Kosovë. /Tribuna/Telegrafi/