Lufta në Ukrainë, raportohen viktima të shumta ndërsa beteja për Bakhmut vazhdon

Ukraina dhe Rusia kanë raportuar se i kanë shkaktuar humbje të mëdha njëra-tjetrës ndërsa beteja për Bakhmut po vazhdon.

Siç kujtojnë mediat e huaja, përcjell Telegrafi, Moska është përpjekur të marrë qytetin lindor të Ukrainës për muaj të tërë në një luftë shkatërruese.

Presidenti ukrainas Volodymyr Zelensky tha se forcat ruse kishin pësuar më shumë se 1,100 vdekje në ditët e fundit, me shumë të tjerë të plagosur rëndë.

Në anën tjetër Rusia pretendon se kishte vrarë më shumë se 220 pjesëtarë të shërbimit ukrainas gjatë 24 orëve të fundit.

BBC shkruan se nuk është në gjendje të verifikojë numrat e dhënë nga asnjëra palë.

Analistët thonë se Bakhmut ka pak vlerë strategjike, por është bërë një pikë qendrore për komandantët rusë që kanë luftuar për të dhënë ndonjë lajm pozitiv në Kremlin.

Veç kësaj, marrja e qytetit do ta afronte Rusinë pak më afër qëllimit të saj për të kontrolluar të gjithë rajonin e Donetsk, një nga katër rajonet në Ukrainën lindore dhe jugore të aneksuar nga Rusia shtatorin e kaluar pas referendumeve të dënuar gjerësisht.

Para pushtimit në Bakhmut jetonin rreth 70,000 njerëz, por atje, tanimë kanë mbetur vetëm disa mijëra.

Ashtu si Rusia, edhe Ukraina i ka dhënë rëndësi politike Bakhmutit, me presidentin Zelensky duke e bërë qytetin një emblemë të rezistencës.

Ndërkohë zyrtarët perëndimorë vlerësojnë midis 20,000 dhe 30,000 trupa ruse janë vrarë ose plagosur deri më tani në dhe rreth Bakhmut. /Telegrafi/