Llamkos Kosova në bojkot

As me rezultate, e as me financa. Llamkos Kosova nuk po kalon në ditët më të mira të saj. Krahas krizës së rezultateve, klubi duket se ka krizë financiare. Për këtë të fundit, futbollistët të mërkurën nuk kanë stërvitur fare. Drejtuesit e klubit u kanë borxh dy pagat e fundit, të cilat është dashur të kryhen më 15 prill. E meqenëse, një gjë e tillë nuk ndodhi as të mërkurën, lojtarët vendosën të mos stërvitin fare.

“Më 15 prill është dashur të na kryhen obligimet. Ne ishim në stadium për të stërvitur dhe për t’u sqaruar me drejtuesit e klubit, por askush prej tyre nuk ishte. Prandaj, vendosëm të mos stërvitim fare. Fjala është për dy pagat e fundit”, thonë lojtarët që deshën të mbesin anonim. Vushtrriasit këtë vit kanë marrë vetëm një pagë.

Ata presin që nesër të merren vesh me kryesinë. “Shpresojmë që të premten (nesër) të bisedojmë me ta dhe të na shlyhen obligimet. Jemi klubi i vetëm që luajmë pa premia dhe në fund as pagat nuk na kryhen me rregull. Nuk e meritojmë këtë duke u bazuar në atë se jemi pranë fitimit të titullit kampion, e po ashtu jemi në garë për ta fituar edhe Kupën”, shtojnë ata. /Arena/Telegrafi/