“Lisistrata” u dha në “Exponto” të Sllovenisë

Teatri Kombëtar i Kosovës (TKK), ishte i pranishëm në festivalin “Exponto”, që mbahet në Lubjanë të Sllovenisë.

“’Lisistrata’, me regji të Elmaze Nurës, që ka bërë edhe adaptimin e tekstit, është mirëpritur nga kritika dhe publiku, thuhet në një kumtesë të TKK-së. “Loja e aktorëve ka qenë e shkëlqyer, duke i dhuruar kështu festivalit një spektakël teatror, të martën, më 3 shtator”.

Svetlana Slapsak, kritike e teatrit në Slloveni, u shpreh për këtë: “Unë e kam pare ‘Lisistratën’ të inskenuar në qindra variante, por kjo që pash sonte është varianti më i mirë që e kam pare ndonjëherë. Është adaptim modern dhe lojë fantastike e aktorëve”.

E kënaqur ka mbetur edhe ambasadorja e Kosovës në Slloveni, Mimoza Ahmeti.

“Që nga koha që jam ambasadore, dje ishte dita që u ndjeva më së miri në misionin tim. Në sallë ishin vetëm pesë shqiptare dhe pjesa tjetër e sallës ishte e mbushur me sllovenë dhe të tjerë. Mënyra se si reaguan ata në shfaqje më bënë krenare me juve”, u shpreh ajo.

Ndërkaq, aktorja nga Maqedonia, Joana Popovska, tha: “Para shfaqjes kishte dhimbje të këmbëve dhe kohës. Më relaksoi kjo shfaqje e mrekullueshme”.

“Lisistrata” thërret për paqe. Është një protestë e grave kundër luftës, konflikteve, telasheve dhe konfuzionit që e shkaktojnë burrat. Ne tekstin antik, protagonistja Lisistrata i vë vetes një detyrë të vështirë – t’i japë fund luftës së Peloponezit.

Heroina e parë komike në historinë e teatrit u kërkon grave nga qytetet e ndryshme greke, të refuzojnë seksin me burrat apo të dashurit e tyre që janë në luftë, derisa ata të detyrohen të bëjnë paqe. Kjo strategji shkakton një betejë të ashpër mes grave e burrave.

“Në adaptimin modern nga regjisorja Nura, greva e seksit nis t’i për kushtëzuar burrat të heqin dorë nga fushatat elektorale, sepse i kanë lënë pas dore bashkëshortet e të dashurat e tyre. Shfaqja karakterizohet nga fryma e spektaklit, me lojë intensive, emocion, humor, skena interesante, që e mbajnë publikun të mbërthyer pas çdo lëvizjeje që ndodh në skenë”.

Në shfaqje luajnë: Mentor Zymberaj, Aurita Agushi, Hazir Haziri, Florentina Ademi, Veton Osmani, Albulena Kryeziu, Ramadan Malaj, Teuta Sadiku, Bledar Racaj, Dafina Berisha. Asistent-regjisor është Diar Xani, skenografia është bërë nga Zeni Ballazhi, muzika nga Korab Shaqiri, ndriçimi nga Asllan Hyseni, ndërsa kostumet nga Njomza Luci,

“Exponto” shënoi sivjet 20 vjetorin e themelimit. Ideja fillestare e këtij festivali kishte më tepër karakter humano-kulturor, që lidhet me fatin e vendeve të dala nga luftërat në ish-Jugosllavi e të artistëve nga këto shtete që shprehnin kreativitetin e tyre. Por, më vonë mori formën e një festivali ndërkombëtar.

Motoja e sivjetme e festivalit ishte: “Ky është limiti”.

Kjo ngjarje është e mbështetur nga Komisioni Evropian, përmes programeve kulturore. /Telegrafi/