LDK vazhdon edhe sot mbledhjen për finalizimin e programit Rruga e Re

Lidhja Demokratike e Kosovës po vazhdon ditën e dytë të mbledhjes me akterët kryesorë të partisë për finalizimin e programit “Rruga e Re”.

Edhe sot po diskutohet intensivisht rreth detajeve të fundit të projekteve madhore që përfshijnë sektorin e ekonomisë, energjisë, arsimit, etj.

Paralelisht, po vazhdojnë punëtoritë grupore të ndarë në sektorë të ndryshëm, raporton kp.

Lexo po ashtu ​LDK në fazën finale të përfundimit të programit "Rruga e Re"

“Ky program ka për qëllim të tejkalojë mendësinë e vjetër të mospunës dhe jo kompetencës, një realitet me të cilin Kosova po përballet për një kohë të gjatë. Programi ‘Rruga e Re’ flet vetëm për të ardhmen e shtetit të Kosovës.

Projektet madhore që janë paraqitur gjatë këtyre takimeve, e që do të jenë pjesë e programit ‘Rruga e Re’, janë projektet më të mëdha që mund të ndodhin gjatë 30 viteve të fundit.

LDK-ja rikonfirmon angazhimin e saj ndaj vlerave të djathta dhe është e përkushtuar për integrimit të Kosovës në Bashkimin Evropian dhe NATO. Me këtë program, LDK shpreh një qëndrim të qartë ndaj ndryshimit dhe përmirësimit të gjendjes së vendit në të gjitha dimensionet”, thuhet më tej.