LDK fton bashkatdhetarët të votojnë partinë e Angela Merkel

As Lidhja Demokratike e Kosovës nuk ka qëndruar indiferente ndaj zgjedhjeve parlmentare që do të mbahen të dielën në Gjermani.

Lideri i LDK-së, Isa Mustafa, përmes një postimi në Facebook, ka apeluar tek bashkatdhetarët tanë me të drejtë vote në Gjermani që të jenë pjesë e procesit zgjedhor.

Postimi i plotë i Mustafës:

“Të nderuar qytetarë

Anëtarë e simpatizantë të LDK-së

Lidhja Demokratike e Kosovës ka përcjellur me kujdes të veçantë fushatën zgjedhore në Gjermani, duke pas parasysh kontributin e jashtëzakonshëm të këtij shteti mik për Kosovën si dhe relacionet e miqësisë të shumanshme ndërmjet dy vendeve.

Përgëzojmë të gjitha subjektet politike gjermane për fushatën e tyre.

I urojmë sukses në zgjedhjet e së dieles Unionit Kristian Demokratikit (CDU) të kryesuar nga Kancelarja Angela
Merkel, si parti simotër në kuadër të Partisë Popullore Evropian (EPP), duke shprehur konsideratat më të larta për rezultatet historike që janë arritur në Gjermani si dhe përkrahjen e pazëvendësueshme që është ofruar për Kosovën dhe rajonin, nën lidershipin e Kancelares Merkel dhe CDU-së.

Ftojmë bashkatdhetarët tanë të jenë pjesë e procesit zgjedhor në Gjermaninë mike, e cila ka kontribut të jashtëzakonshëm në pavarësinë, si dhe në zhvillimin ekonomik dhe demokratik të Kosovës”, ka shkruar Mustafa. /Telegrafi/