LDK duhet të rindërtohet

Nëse ka diçka që nuk kuptohet dhe që nuk ka kuptim në skenën dhe jetën politike të Kosovës, atëherë kjo është Lidhja Demokratike e Kosovës (LDK). Ka pakuptimësi në drejtimin e kësaj partie, ka pakuptimësi në menaxhimin e kësaj partie, ka pakuptimësi në përgjegjësinë dhe përgjegjshmërinë e kësaj partie, si dhe, ajo kryesorja, ka pakuptimësi në llogaridhënien e kësaj partie.

Krejt puna rreth LDK-së është e thjeshtë dhe e qartë: problemet e brendshme të LDK-së janë probleme të brendshme të LDK-së. Por, për shkak të insistimit publik, janë disa gjëra që bëjnë që problemet e brendshme të LDK-së të jenë edhe probleme të jashtme të saj, pra edhe probleme të qytetarëve të Kosovës.

LDK ka qenë në pushtet si e vetme dhe ajo është sot pjesë e Qeverisë në Kosovë, prej 1999 e këtej. Gjëja që e ka sjellë dhe e ka mbajtur në pushtet këtë parti, pra Qeveri dhe qeverisje, është Ibrahim Rugova, lideri i saj. Më këtë, ky emër me automatizëm e mbanë LDK-në si pjesë të problemeve të përditshme të qytetarëve të Kosovës, krahas rritjes së çmimeve të artikujve ushqimor pa kurrfarë kontrolli qeveritar.

Nga këtu, është gazetaria ajo që temën e LDK-së e ndërlidh me publikun dhe jetën e përditshme të qytetarëve të Kosovës. Sepse janë gazetarët, pra mediat dhe agjentët e tyre, të cilët e ndërlidhin ose më saktësisht e paragjykojnë fatin e LDK-së (dhe e kanë paragjykuar gjithmonë) me fatin e Kosovës. Ndërkohë që LDK as atëherë e as sot sa është në pushtet, nëse diçka nuk përfillë atëherë kjo është fati i qytetarëve dhe i vet shtetit të Kosovës. Shkurt, lidhja e LDK-së me fatin e Kosovës është trillim dhe triler medial-gazetaresk që po na përsëritet vazhdimisht. Sepse këto dyja s’kanë asgjë (dhe asnjëherë s’kanë pasur asgjë) të përbashkët, për një arsye të vetme dhe të thjeshtë: LDK mendon që qytetari i Kosovës ekziston për të dhe jo e kundërta. Kjo formulë ka qenë dhe mbetet brumi i LDK-së.

Por, trillimet mediale nuk janë të rastësishme. Konkretisht, fjala është për korrupsionin dhe krimin e organizuar. Kështu, pasi EULEX-i ka nisur (por as Zoti nuk e di nëse ato do të përfundojnë ndonjëherë) disa hetime ndaj disa zyrtarëve të lartë e të ulët qeveritar për korrupsion, atëherë lehtë mund të paramendohet që shumica nga ta pritet të jenë nga radhët e PDK-së. Tek e fundit, kjo del edhe si e natyrshme pasi PDK është udhëheqëse qeveritare. Por, çfarë ndodhë nëse kërkimet dhe hulumtimet për korrupsion dhe krim të organizuar shkojnë edhe më thellë? Tashti, duke marrë parasysh faktin e pamohueshëm që LDK është në pushtet gjatë tërë këtij dhjetëvjeçari, atëherë lehtë mund të përfundohet se hetimet do të gjejnë jo disa por dhjetëra e dhjetëra zyrtarë të LDK-së të lidhur për korrupsionin. Shkurt, gazetarët që e lidhin fatin tonë me fatin e LDK-së, në fakt, e mbrojnë LDK-në nga hetimet për korrupsion.

Sido që të jenë komentet, EULEX nuk guxon t’i ndalë hetimet për korrupsion dhe krim të organizuar institucional. Kjo është qenësorja. E nëse ka LDKistë (dhe publicistë e gazetarë) që thonë që arrestimi i LDK-së do të ishte arrestimi i Kosovës, atëherë këtë le ta thonë nga Dubrava.