LDK dhe Isa Mustafa në udhëkryq

A ishin tridhjetë ditët e fushatës zgjedhore si tridhjetë ditët e Ramazanit? Kjo është çështja ose dilema që shtrohet sot, pas fushatës zgjedhore të Isa Mustafës, kandidatit të Lidhjes Demokratike të Kosovës (LDK), për komunën e Prishtinës.

Siç e dimë nga fushata zgjedhore për zgjedhjet komunale 2009, përqendrimi i Isa Mustafës nuk ishte ose nuk ishin kandidatët e partive të tjera për garën zgjedhore për postin e të parit të komunës së Prishtinës, por ishte Qeveria qendrore e ndërtuar nga, aktualisht, koalicioni PDK-LDK. Kjo ishte lufta e tij (qasja dhe strategjia) për garën për zgjedhjet komunale të Kosovës për vitin 2009. Tashti, a ishte kjo luftë e drejt ose jo, kjo është tjetër muhabet. Sepse Isa Mustafa shumë pak e hiq foli për ujin, kanalizimin, ndërtimet dhe, përgjithësisht, mirëqenien e qytetarit të komunës së Prishtinës në katër vitet e ardhshme. Arsyeja themelore pse Isa Mustafa nuk shkoj as në balotazh me asnjërin kundër-kandidatë ishte pikërisht lufta (qasja dhe strategjia e tij) që të sulmojë Qeverinë aktuale të përbërë nga koalicioni PDK-LDK.

Sipas kësaj qasje, koalicioni PDK-LDK nuk ishte i natyrshëm, ose ishte imponues për shkak të rrethanave të atëhershme politike, siç ishte shpallja e pavarësisë dhe shpallja e simboleve të shtetit të Kosovës (himni dhe flamuri). Në fakt, siç u mor vesh nga këto zgjedhje, këtë qëndrim të Isa Mustafës e ndajnë edhe shumica e kandidatëve të LDK-së për kryetarë të komunave, por edhe kryesia e kuvendi i kësaj partie. Shkurt, Isa Mustafa fitoi duke e rezistuar dhe e refuzuar këtë koalicion, pra, duke e kritikuar dhe përulur vazhdimisht për tridhjetë ditë rresht. Ashiqare, edhe pjesa e votuesve që votuan LDK-në kudo në secilën komunë, pra, jo vetëm në Prishtinë, e ndanin të njëjtin mendim.

Tashti, pas datës 15 nëntor 2009, kur Isa Musfata siguroi shumicën e votave dhe kështu pa pasur nevojë për balotazh, shtrohet çështja: a e ka pasur Isa Mustafa njëmend, pra, përnime, apo e tëra kjo ishte pjesë e fushatës zgjedhore, e 16 nëntori dhe ditët vijuese do të jenë asgjë më shumë sesa normale për LDK-në dhe vet Isa Musfatën?

Ashiqare, shumica nga kandidatët e partive politike për kryetarë të komunave të Kosovës po shkojnë në balotazh. Në disa komuna shkojnë kandidatët e PDK-LDK, në disa komuna shkojnë kandidatët e PDK-AAK, e në disa komuna edhe kandidatët LDK-AAK. Tashti shtrohet çështja: cili do të jetë qëndrimi i LDK-së në ato komuna ku do të garojnë kandidatët e PDK-AAK, cili do të jetë qëndrimi i AAK-së në ato komuna ku do të garojnë kandidatët e PDK-LDK? Dhe në krejt këtë muhabet (matematikë), cili do të jetë qëndrimi i koalicionit AKR-LDD karshi secilit opsion?

Sipas qasjes dhe strategjisë së Isa Mustafës, votuesit e LDK-së do të votojnë kandidatët e AAK-së në ato komuna ku garon PDK me AAK, pra, ku nuk do të garojë LDK-ja. Dhe anasjelltas. Votuesit e AAK-së do të duhej të votonin për kandidatët e LDK-së në ato komuna ku nuk garon AAK-ja, pra, ku garon LDK me PDK. Ashiqare, kjo porosi ose ky përcaktim politik me automatizëm e ndëshkon koalicionin aktual qeveritar PDK-LDK dhe e bën të pavlerë (me Fatmir Sejdiun si Presidenti i Kosovës nga radhët LDK-së).

E tash, nëse LDK-ja e pas zgjedhjeve komunale të 15 nëntorit 2009 përcaktohet që të votojë për PDK-në në ato komuna ku shkojnë në balotazh PDK me AAK, atëherë po del që Isa Mustafa, në fushatën zgjedhore për kryetar të komunës së Prishtinës, të ketë bërë asgjë më shumë sesa fushatë zgjedhore. Por, tashmë vjen në çështje dhe në pikëpyetje (të madhe bile) autoriteti dhe kredibiliteti i Isa Mustafës (i cili do të qeverisë me komunën e Prishtinës edhe për katër vjet të radhës) para votuesve të tij të komunës së Prishtinës. Po e përsërisim. Isa Mustafa fitoi besimin dhe votën e shumicës së qytetarëve të komunës së Prishtinës për shkak të kundërshtimit të koalicionit qeveritar PDK-LDK. Ndryshe nga ky qëndrim, këta votues do të ndiheshin të tradhtuar. Bile, ndoshta edhe më keq.

Plus, cili do të jetë perceptimi politik nëse AAK përcaktohet që të përkrahë kandidatët e LDK-së në ato komuna ku garojnë kandidatët e PDK-LDK? A do të thotë kjo që LDK, në mënyrë të natyrshme, po lidhet me AAK-në dhe anasjelltas? E tash, nëse ky bashkëpunim i natyrshëm do të ndodhë edhe në terren, atëherë cila është arsyeja që Fatmir Sejdiu të vazhdojë të jetë President i Kosovës në koalicion me PDK-në? Ose, cili do të jetë edhe roli i mëtejmë e Eqrem Kryeziut në LDK pasi i humbi zgjedhjet (nuk fitoi në raundin e parë) në Prizren? Cila do të jetë pesha e fjalës së tij në LDK pas datës 15 nëntor 2009?

Ashiqare, përveç shumë dilemave, këto zgjedhje po sjellin rikonfigurimin e ngadaltë por të sigurt të skenës politike të Kosovës. Pastaj, këto zgjedhje e sollën në çështje mungesën e Kodit të Zgjedhjeve, por edhe mungesën e emancipimit politik të partive tona politike. Sido që të jetë, është mirë kur gjërat janë në lëvizje.