Kuorumi, pika për të cilën opozita ka atakuar zgjedhjen e Thaçit

Zgjedhja e Hashim Thaçit në majë të pushtetit është bërë në mungesë kuorumi, pretendon opozita në kërkesën që të premten e ka adresuar në Gjykatën Kushtetuese. Ka prezantuar argumente dhe ka ngritur 10 pyetje në këtë temë.

“Koha Ditore” ka arritur të hënën ta sigurojë një kopje të kësaj kërkese të firmosur nga deputetët e LVV-së, AAK-së e Nismës, lëndë e së cilës është shfuqizimi i vendimit të Kuvendit për zgjedhjen e presidentit të Republikës.

Kuvendi identifikohet si palë përgjegjëse për shkeljen. Dhe, përpos përmbysjes së vendimit me të cilin është zgjedhur Thaçi president, gjykatës i është kërkuar të vendosë masë të përkohshme përkitazi me këtë çështje.

Opozita ka argumentuar se kërkesa është brenda juridiksionit të Gjykatës, ngaqë neni 113 precizon se dhjetë a më shumë deputetë, brenda një afati prej tetë ditësh nga dita e miratimit, kanë të drejtë të kontestojnë kushtetutshmërinë e çfarëdo ligji ose vendimi të miratuar nga legjislativi, si për përmbajtjen ashtu edhe për procedurën e ndjekur.