Kryeziu: Rekomandimi i Ahtisaarit për zgjedhje veç është kryer

Nënkryetari i LDK-së, Eqrem Kryeziu në një intervistë për radion Evropa e Lirë është përgjigjur ndaj kërkesave të partive opozitare që brenda nëntë muajsh të mbahen zgjedhjet në Kosovë – siç e parashikon Plani i Ahtisaarit. Kryeziu ka thënë se Qeveria e Kosovës dhe Parlamenti, nuk do të duhej frikësuar nga zgjedhjet, cilado qofshin ato – mirëpo ka shtuar se nëse kundrohet me vëmendje rekomandimi i Ahtisaarit, që nuk është normë kushtetuese, rekomandimi veç është kryer.

Duke u përgjigjur në pyetjen nëse do ketë zgjedhje të reja apo jo, Kryeziu është përgjigjur: “Struktura demokratike, çfarë shpresojmë dhe unë të paktën besoj se është Qeveria e Kosovës dhe Parlamenti, nuk do të duhej frikësuar nga zgjedhjet, cilado qofshin ato. Por, nga ana tjetër, kur presidenti Ahtisaari projektoi zgjedhje të reja, ajo ishte para një viti e gjysmë, dhe në fakt u mbajtën në nëntorin që shkoi. Do të thotë, nëse kundrohet me vëmendje rekomandimi i Ahtisaarit, që nuk është normë kushtetuese, rekomandimi veç është kryer, por varet prej zhvillimeve, efikasitetit të kësaj qeverie”.

Nëse kjo qeveri tregon performansë si duhet, sipas Kryeziut, atëherë ajo ka mandatin katërvjeçar, gjithashtu me vendim të autoritetit të Kombeve të Bashkuara. “Nëse jo, unë ju siguroj se nëse kualifikimet politike janë se nuk funksionon si duhet kjo qeveri, nuk është pra në nivelin e detyrës me themelet e shëndosha të shtetit më të ri në Evropë dhe në botë, atëherë natyrisht se mund të ketë zgjedhje të reja, por ky është vlerësim politik, e jo një rekomandim që ka forcën e dispozitës ligjore”, ka thënë ai.

Ndërkaq i pyetur nëse edhe me kushtetutën e re, presidenti nuk duhet të mbajë post tjetër politik dhe se a do të ketë zgjedhje edhe brenda LDK-së, Kryeziu është përgjigjur: “Unë besoj se edhe kryetari, jo vetëm që e obligon Kushtetuta, por ai më së miri e kupton ligjërimin kushtetues, sigurisht se do t’i nënshtrohet dispozitave kushtetuese. Se a do të ketë forma të tjera, do të thotë mund të thirret Kuvendi ose Këshilli i Përgjithshëm dhe të japë një solucion, kjo do të duhej biseduar”, ka thënë ai. /telegrafi/