KITU: Me përjashtimin e AKA-së nga EQAR, Kosovës i është shkaktuar dëm i madh

Koalicioni për Integritet dhe Transparencë në Universitet (KITU) e ka pranuar me shqetësim lajmin për përjashtimin e Agjencisë së Kosovës për Akreditim (AKA) nga Regjistri Evropian për Sigurimin e Cilësisë në Arsimin e Lartë (EQAR).

Në reagimin e KITU-s thuhet se shkarkimi arbitrar i të gjithë anëtarëve të Bordit të AKA nga Qeveria e Kosovës, përfshirë edhe ndërkombëtarët, ka shkaktuar dilema të arsyeshme për kapacitetin e Agjencisë për të vepruar jashtë ndikimit të politikës ditore, si në vend ashtu edhe tek organizatat ndërkombëtare.

“Në fakt, ne mendojmë se dilema të tilla ka pasur edhe më herët, pasi, gjatë historisë së saj 10-vjeçare, AKA,jo një herë, është vënë në shërbim të interesave politike dhe atyre biznesore. Megjithatë, në vitet e fundit, AKA ka treguar një përkushtim në rritje, ndonëse jo i kënaqshëm, për t’i adresuar problemet e cilësisë në arsimin e lartë, që ka rezultuar me zvogëlimin e numrit të programeve të akredituara. Në kushte të tilla, shkarkimi i gjithë strukturës udhëheqëse të Agjencisë nuk ka mundur të kuptohet ndryshe, përveç si ndërhyrje politike ndaj një institucioni që duhet të jetë i pavarur”, thuhet në reagim.

Në njoftimin e KITU-s thuhet se me vëmendje kanë analizuar vendimin e EQAR për përjashtimin e AKA dhe janë të indinjuar me faktin se argumentet për shkarkim që i janë ofruar këtij mekanizmi prestigjioz evropian nga ana e institucioneve të Kosovës janë ‘informatat e natyrës konfidenciale’ që, gjoja, qenkan në posedim të kryeministrit dhe ‘parregullsitë’ për të cilat nuk është dhënë asnjë shpjegim më shumë.

“Po ashtu, shprehim keqardhje për faktin se përzgjedhja e anëtareve të rinj të Bordit të AKA nuk është bërë përmes një procesi transparent dhe të besueshëm që do të argumentonte pretendimet e Qeverisë se synon depolitizimin e AKA”.

Në njoftim më tej thuhet se me përjashtimin e AKA nga EQAR, Kosovës i është shkaktuar dëm i madh që shkon përtej imazhit dhe funksionimit normal të AKA.

Më tej thuhet se diplomat e lëshuara nga institucionet e akredituara nga një Agjenci, e cila, është shpallur jokredibile nga një mekanizëm prestigjioz evropian, do të kenë trajtim të veçantë në vendet evropiane dhe pasojat do t’i vuajnë qytetarët e Kosovës që duan t’i vazhdojnë studimet ose të punësohen në ato vende.

“Për këtë arsye kërkojmë nga institucionet e Kosovës, në radhë të parë nga Kuvendi, Qeveria dhe MASHT që të jenë në nivel të detyrës me rastin e përcaktimit të përgjegjësisë për veprimet që kanë rezultuar me përjashtimin e AKA nga EQAR. Po ashtu, kërkojmë që të shfrytëzohen të gjitha mundësitë që janë në dispozicion për të rikthyer besimin e humbur të EQAR ndaj sistemit të arsimit të lartë në Kosovë: ta japë arsyetim të plotë për shkarkimin e anëtarëve të bordit të AKA; t’i tërheqë emrat e propozuar për bordin e ri dhe ta nisë një proces transparent të përzgjedhjes së anëtarëve të rinj; të fillojë iniciativën për ndryshimet e nevojshme ligjore që pamundësojnë veprime të tilla të pamatura në të ardhmen”. /Telegrafi/