Këto thuhet se janë “top shtetet më të rrezikshme në SHBA”

Institucione hulumtuese që merren me këto të dhëna kanë zbuluar se cilat shtete të SHBA janë më të rrezikshmet për të jetuar për krime, lëndime dhe vdekje të lidhura me incidente.

Dhe shkalla e vdekjeve në SHBA është afërsisht 2.5 herë më e lartë se normat mesatare në vendet e tjera me të ardhura të larta, ka gjetur hulumtimi i bazuar në bazën e të dhënave të vdekshmërisë të Organizatës Botërore të Shëndetësisë, shkruan Newsweek, përcjell Telegrafi.

Këto vdekje janë shkaktuar kryesisht nga aksidentet e transportit, vrasjet, vetëvrasjet dhe mbidozat e drogës,…

Megjithatë, jo të gjitha shtetet janë të barabarta kur bëhet fjalë për aksidentet dhe vdekshmërinë e lidhur me krimin.

Një studim i ri nga “Caputo dhe Van Der Walde Injury & Accident Attorneys” ka krahasuar çdo shtet në 10 aspekte, duke përfshirë vdekjet në trafik, lëndimet në vendin e punës, vdekshmërinë nga armët e zjarrit, lëndimet hekurudhore dhe krimet kundër personave dhe pronave për të vlerësuar se cilat shtete janë “më të rrezikshmet”.

Pra, si renditen shtetet?

Kur u morën parasysh të gjitha metrikat, këto 10 shtete u shfaqën si më të rrezikshmet për të jetuar: New Mexico; Louisiana; Arkansas; Alaska; Missouri; South Carolina; Tennessee; Nevada; Colorado; Oklahoma.

Kështu, duke parë pesë shtetet më të rrezikshme, New Mexico renditet lart, me nivele të larta aksidentesh trafiku, vjedhje, sulme, vrasje dhe vjedhje automjetesh, si dhe vdekshmëri nga armët e zjarrit pothuajse dyfishi i mesatares kombëtare.

Louisiana doli në vendin e dytë, duke u renditur si shteti më i rrezikshëm për aksidente trafiku. Shteti gjithashtu ka shkallën e dytë më të lartë të sulmeve për frymë dhe vdekshmërisë nga armët e zjarrit.

Arkansas, shteti i tretë më i rrezikshëm për të jetuar, pa pothuajse dyfishin e mesatares kombëtare të vrasjeve për frymë në vitin 2022, në 10.24 për 100,000 krahasuar me mesataren kombëtare prej 5,89 për 100,000. Shteti gjithashtu renditet i dyti më i keq për vdekjet në trafik.

Ndërkohë në anën e kundërt të spektrit, pesë shtetet e mëposhtme u renditën si më pak të rrezikshmet: Rhode Island; New Hampshire; Massachusetts; New Jersey; Maine. /Telegrafi/