Kaos në listën zgjedhore të Maqedonisë

Vazhdojnë të dalin në sipërfaqe parregullsitë e listës zgjedhore dhe skandalet e saj. Pas disa hulumtimeve, Alsat-M zbuloi të dhënat për 115 banorë të regjistruar në një shtëpi të vetme. Shtëpia dy dhomëshe gjendet në rrugën “Dimçe Mirçev” në Komunën Qendër dhe dy banorët e vërtetë të saj ishin po kaq të habitur kur kishin marrë lajmin se ligjërisht, ata janë të regjistruar kinse bashkëjetojnë me mbi 100 persona që nuk i kishin njohur kurrë, transmeton Telegrafi.

Gjatë hulumtimit, rast të ngjashëm dhe po kaq të dyshimtë, është zbuluar edhe në rrugën “Maksim Gorki” të Komunës Qendër, në njërën nga banesat e të cilës, janë të regjistruar 66 banorë. Komisioni Shtetëror Zgjedhor (KSHZ), gjatë dy ditëve të fundit ka qenë i pakapshëm për të sqaruar se si do të përballet ky institucion me rastet e këtilla, si dhe a do të bëhet kontroll në terren edhe për këto raste.

Edhe TV Telma ka njoftuar për dy raste mjaft interesante, ku në adresë të ambasadës amerikane në Shkup është regjistruar një votues, si edhe dy të tjerë në adresë të ambasadës britaneze. Katër votues janë të regjistruar në shtëpinë e kryetarit Gjorge Ivanov, pesëmbëdhjetë në atë të deputetit Pavle Sazdov, tre janë të regjistruar të shtëpia e Gordana Jankullovsës, katërmbëdhjetë në adresë të Agjencisë së prokurimit, të gjithë nga Pusteci. Votues janë zbuluar edhe në shtëpi të rënuara./Telegrafi/