“Kallashnikovi serb” dhe mitra e dhunuar e femrës shqiptare

Ekspozita “Mendoj për ty” në përkrahje të viktimave të dhunës seksuale të luftës së fundit në Kosovë, është e qëlluar dhe humane, e njëkohësisht është edhe akuzuese dhe ndërgjegjësuese.

Por, këtu, në këtë vepër artistike, përpos bërthamës së sinqertë humane, ka edhe një kryeqëllim politik dhe ideologjik. Në të njëjtën kohë, kjo vepër e nderuar artistike, me qëllim është duke dërguar porosi politike dhe informacione jo të qarta në hapësirën publike. Kjo ekspozitë, në mes të Prishtinës, po përpunon "fakte" jo të drejta, “dëshmi” dhe “fotografi” të paargumentuara para botës, si dhe tek vet shqiptarët.

Pse e them këtë?

Fjalia, simbolet dhe gjuha që po përdorët në këtë vepër artistike tregon se kjo ekspozitë madhore i është kushtuar "grave të dhunuara në luftë". Shtrohet pyetja: kush janë këto gra të dhunuara në luftë? Janë serbe? Boshnjake? Rome? Turke? Malazeze? Egjiptase? Apo janë femra shqiptare?

Viktima nuk ka komb e as etni. Viktima është e pafajshme, pavarësisht etnisë e kombit. Këtu nuk ka dilemë. Por, dhuna e organizuar seksuale, që u përdor si “kallashnikov serb” për të shkatërruar qenësinë shqiptare, ka shtet, ka komb, etni dhe plane ushtarake gjeo-politike. Pse “harrohet” këtu të shkruhet, të ceket e të nënvizohet me titullin dhe moton si: “Viktimat seksuale të dhunës së politikave serbe ndaj gruas shqiptare”? Kjo ekspozitë ka karakter politik! Kjo ekspozitë politike është edhe dhunë, ofendim dhe torturë për të gjitha ato femra të dhunuara shqiptare.

Përse mendoj kështu?

Klithja që po i dërgohet opinionit në përgjithësi është jo e qartë. Është “me sherr”? Është jo e qartë, sepse gjuha dhe fotografia mediatike, që po përdorët me këtë rast, është e "dykuptimtë". Është “me sherr” sepse kjo ekspozitë është gjithakuzuese. Është historiharruese…!

Keni harruar se në Kosovë u dhunuan mbi 20 mijë femra shqiptare? U dhunuan 20 mijë gra, nëna, motra e vajza shqiptare. Hej, në shtëpi të vet! U përdor “mitra shqiptare” si eksploziv e si municion! Pse tani të relativizohet kjo ofensivë e politikave serbe!? Përse frikësoheni të përdorni emrin "Shqiptare" për femrën e dhunuar shqiptare? Përse tuteni ore të mbitheksoni se sulmuesi i “mitrës shqiptare” ishte “penisi i politikave serbe”? Pse? Pse? Deri në pafundësi pse?

Nuk është profesionale, njerëzore dhe bile as morale që të "rrafshohet" dallimi në mes “të së drejtës dhe të padrejtës”. Nuk është humane që të njejtësohet “viktima me agresorin”. Jo, nuk është e shëndetshme që të njejtësohet krimi seksual i “penisave të institucioneve serb” me veprimet e disa dhjetëra banditëve të tjerë shqiptarë.

Shkurt e shqip: Në Kosovë gjatë luftës nuk u dhunuan gratë seksualisht, por u dhunuan seksualisht gratë shqiptare. Jo nga banditët, por nga shteti dhe politika serbe.