Janë në anë të kundërta, por vazhdojnë raportet e mira mes OBRM-PDUKM dhe BDI

OBRM-PDUKM-ja dhe BDI-ja vazhdojnë të mbajnë raporte të mira edhe pse janë në anë të kundërt të pushteteve. Kjo më qartë shihet te kritikat e OBRM-PDUKM-së opozitare, të cilat adresohen vetëm te dikasteret me të cilat udhëheq LSDM-ja, duke i anashkaluar resorët dhe funksionarët e BDI-së. Deputeti i OBRM-PDUKM-se Dragan Danev, mohon se partia e tij është selektive në këtë aspekt, ndërsa nuk përgjigjet në pyetjen e Alsat, nëse do të bashkëpunonin me BDI-në në zgjedhjet e ardhshme parlamentare, edhe pse kjo e fundit ua kthej shpinën në zgjedhjet e 2016-tës.

“Ne i kritikojmë absolutisht të gjithë politikat e këqija pavarësisht nëse janë ministritë e udhëhequra nga LSDM-ja apo nga BDI-ja apo nga kushdo qoftë”. Gazetari: A do të kishit bërë koalicion me BDI-në në zgjedhjet e ardhshme?! “Ne e kërkojmë besimin nga qytetarët e RM-së”, u përgjigj Dragan Danev, OBRM-PDUKM.

Bashkëpunimi në zgjedhjet e ardhshme parlamentare mes OBRM-PDUKM-së dhe BDI-së, nuk mohohet as nga partia e Ahmetit.

Ne nuk predikojmë se kush do të jetë partner i BDI-së. Partnerët e BDI-së i cakton populli në zgjedhjet parlamentare. Ne nuk kemi preference e as partnerë strategjik. Atë që e voton populli, ne jemi në gjendje që me programin e tonë siç kemi bërë gjithmonë, të ofrojmë ofertën tonë – u shpreh Rexhail Ismaili, BDI.

Standardet e dyfishta të OBRM-PDUKM-së i vërejti edhe partia e Zaevit në pushtet, e cila këtë gjë nuk e la pa ua përmendur ish partnerëve të qeverisë paraprake.

“Paramendojeni, nuk ekziston asnjë kritikë për ministritë apo për resorët e BDI-së. Jo nuk ka. Kritika ka vetëm për ministrat e LSDM-së. Kjo shihet qartë se është një sjellje servile ndaj partnerit të deritanishëm qeveritar”, deklaroi Tomisllav Tuntev, Koordinatori parlamentar i LSDM-së.

OBRM-PDUKM-ja dhe BDI-ja ftohën marrëdhëniet pasi kjo e fundit bëri koalicion me LSDM-në, por më vonë krerët e ish partnerëve qeveritarë, filluan që të shpërndajnë fjalë miradije për njëri tjetrin.

“Ahmeti është politikan i mençur dhe me përvojë. Unë si më i ri ndoshta do të mësoj ose do të marr ndonjë specifikë pozitive nga ajo bisedë”, tha Hristjan Mickoski, OBRM-PDUKM.

“Unë mendoj se qëndrimet e OBRM-PDUKM-së kanë qenë transparente në kongresin që e mbajti. Por edhe njëherazi të njëjtat i ka konfirmuar edhe kryetari i ri, Miskoski”, u shpreh Ali Ahmeti, Kryetar i BDI-së.

Pas zgjedhjeve parlamentare të vitit 2016 kur Zaev mori mandatin për të bërë Qeverinë pasi të njëjtën gjë dështoi ta bëj Gruevski, OBRM-PDUKM i bënte thirrje Ahmetit që të respektojë parimin “fituesi me fituesin”, siç kishte kërkuar edhe vetë BDI-ja paraprakisht, por pas presioneve te shumta në opinion dhe reagimeve nga bashkësia ndërkombëtare, partia e Ahmetit vendosi të ndryshoj partnerin 14 vjeçar në qeveri duke prishur kështu parimin “Fituesi me fituesin” të cilin e kishte mbrojtur fuqimisht në vitet 2006-2008 kur PDSH-ja i kishte hyrë në qeveri më OBRM-PDUKM-në./alsat-m/