Inaugurohet për një mandat të dytë si president, Macron zotohet të ndërtojë një “Francë më të fortë”

Presidenti Emmanuel Macron të shtunën u inaugurua për një mandat të ri, duke e bërë atë liderin e parë francez në 20 vjet që do të shërbejë një mandat të dytë.

Inaugurimi vjen pas fitores së tij në zgjedhje ndaj politikanes së ekstremit të djathtë Marine Le Pen në raundin e dytë të zgjedhjeve presidenciale të 24 prillit.

Inaugurimi presidencial filloi në orën 11:00 në Pallatin Élysée dhe ceremonia nisi një sërë hapash kyç, ndërsa Macron fillon një mandat të ri pesë-vjeçar të mbushur me sfida të brendshme dhe ndërkombëtare.

Gjatë ceremonisë, kreu i Këshillit Kushtetues, Laurent Fabius, lexoi një deklaratë që konfirmonte fitoren e Macron në raundin e dytë të zgjedhjeve presidenciale më 24 prill me një rezultat prej 58.5 për qind kundër rivales së ekstremit të djathtë Marine Le Pen.

Në një traditë që daton që nga Mesjeta, 21 të shtëna me topa u qëlluan nga kompleksi përkujtimor ushtarak i Invalidëve në Paris.

Dhe gjatë një fjalimi kryesor, Macron u zotua të ndërtojë një “Francë më të fortë” në mandatin e tij të dytë. /Telegrafi/