Ina Rama merr mbështetje në Londër

Kryeprokurorja shqiptare Ina Rama ka marrë mbështetje në Londër nga Prokuroria angleze për rezultate të besueshme dhe hetime të paanshme që janë në vazhdim e sipër. Ambasada britanike ka thënë në një njoftim për media se Rama, e cila zhvilloi një vizitë disa-ditore në Londër, është ftuar nga Shërbimi Mbretëror i Prokurorisë së Mbretërisë së Bashkuar.

Ina Rama është takuar me Prokurorin e Përgjithshëm të Anglisë, Dominic Grieve, i cili ka thënë se vizita e Prokurores së Përgjithshme shqiptare ka qenë një mundësi e vlefshme për të shkëmbyer përvojat dhe praktikat më të mira, me një prej institucioneve kryesore ligjore të Shqipërisë.

Ai ka thënë gjithashtu se shpreson se një bashkëpunim i tillë do të ndihmojë në forcimin e kapacitetit të Zyrës së Prokurores dhe në mbështetjen e tyre në përpjekjet për të dhënë rezultate të besueshme e të paanshme në hetimet në vazhdim. Prokurori i Përgjithshëm Britanik ka theksuar se institucione të forta, profesionale e të pavarura janë të domosdoshme për të konsoliduar demokracinë në Shqipëri dhe për ta sjellë vendin më pranë anëtarësimit në BE.

Kryeprokurorja Ina Rama është takuar në Angli edhe me drejtorin e Prokurorisë Publike, Keir Starmer, zyrtarë të Agjencisë kundër Krimit të Organizuar (SOCA) dhe ka vizituar një gjykatë të Mbretërisë së Bashkuar. /Telegrafi/