Identiteti në zvetënim

Ditëve të fundit jemi dëshmitarë të restaurimit të Hamamit të Prizrenit, nga i cili doli i shëmtuar ky objekt, meqë pjesa tradicionale e Hamamit u shndërrua në objekt "modern", duke humbur origjinalitetin e tij.

Ky është vetëm një rast që tregon që ne jemi duke harruar historinë, traditën dhe identitetin tonë. Edhe pse Hamami nuk i përket identitetit tonë, ai është pjesë e historisë që kemi kaluar.

Ata që bënë restaurime të tilla nuk e duan Kosovën; nuk e duan historinë dhe nuk ia dinë vlerën identitetit tonë.

Gjatë kohës sa ishim me shekuj të pushtuar nga të tjerët, ishim me fanatizëm – duke dhënë edhe jetën – në mbrojtje të historisë dhe identitetit tonë shqiptar. Ndërsa, sot të lirë, të pavarur, po e shkatërrojmë atë që krijuan paraardhësit tonë me mund e sakrificë: Veprat që tregojnë historinë tonë, vuajtjet tonë për liri e pavarësi.

Ne jemi ata që gjithë historinë tonë të luftës së fundit e zhdukëm, i rrënuam dëshmitë e gjenocidit serb mbi shqiptarët, rrënuam shtëpitë, kullat e djegura nga serbet, shitem për hekur tanket serbe që u shkatërruan nga U ÇK-ja që tregojnë triumfin e luftëtarëve për liri, njollosem kullat e qëndresës, humbën gjurmët e luftës, vuajtjeve që shkaktoi armiku shekullor.

Dhe, sot kemi ardhur në një gjendje që në shikim të parë duket që në Kosovë nuk ka pasur luftë, ndërkaq që shohim shtetet tjera që me shekuj ruajnë gjurmët e luftës – vendet e betejave që pasqyrojnë identitetin e tyre.

Sot e 16 vjet ende nuk kemi dënim të Serbisë për krimet e bëra në Kosovë, nuk kemi dëmshpërblim për shkatërrimet e bëra. Por, një gjë e tillë duhet të ndodhë dhe këtë duhet ta bëjnë udhëheqësit tanë, duke e paditur Serbinë për krimet e realizuara në Kosovë. Dhe, kur vjen kjo ditë, si do të dëshmojmë ne për shkatërrimet e bëra nga serbet, kur kemi shkatërruar shumëçka të vjetër duke ndertuar objekte të reja.

Sot shkatërrojmë monumentet historike me shekujt të vjetra. Për çfarë vetëdije kulturore flasim ne kur nuk ruajmë shtetin tonë, kulturën dhe identitetin tonë!?

A duhet që monumentet tona historike t’i ruajnë të tjerët (UNESCO) nga vet ne? Me çka duhet të krenohemi ne, kur shkatërrojmë gjithçka të vjetër duke ndërtuar objekte të reja, me mendjen e sëmurë që të bëhemi evropianë, duke menduar që të jesh evropian do të thotë qytetërim!? Të mendosh kështu është absurde, dhe asnjëherë nuk duhet të nisemi nga kjo logjikë.

Popull i qytetëruar është ai popull që kultivon kulturën e vet tradicionale, historinë dhe identitetin duke qenë konkurrent i fortë në tregun evropian dhe botëror të vlerave.

Rasti i Hamamit të Prizrenit duhet të dënohet nga të gjithë ne. Rastet e tilla nuk duhet kurrë më të përsëriten. Shteti duhet t’i mbrojë këto monumente e jo t’i shkatërrojë dhe secili nga ne duhet të kontribuojë në ruajtjen dhe kultivimin e kulturës sonë, kulturë kjo që na bënë të veçantë dhe të pasur si popull, sepse si kemi filluar ne ta zhdukim historinë dhe kulturën tonë, do të mbesim popull pa identitet, e popujt pa identitet shuhen.