Identifikohet personi i katërt që kërcënonte Edi Ramën

Një person i katërt, pjesëmarrës në kërcënimet ndaj kryetarit të PS, Edi Rama, është identifikuar nga Prokuroria e Tiranës.

Burime nga organi i akuzës i kanë thanë të përditshmes Panorama se një banor i Burrelit është bashkëpunëtori i katërt i tre shtetasve të arrestuar javën e kaluar, me akuzën e “sigurimit të kushteve dhe mjeteve për të kryer vrasje” ndaj Ramës.

Shtetasit Luan Rami (37), Fatos Rami (29) dhe Afrim Kiça (33), të tre lindur në Burrel dhe banues në Tiranë, u arrestuan nga policia një javë më parë, me akuzën e “kanosjes dhe planeve për vrasje” ndaj kreut të PS, Edi Rama.

Policia njoftoi fillimisht se ata po siguronin mjetet dhe kushtet për realizimin e krimit, por më pas, drejtori i përgjithshëm i policisë, Hysni Burgaj tha se gjithçka kishte ndodhur, pasi makina e shtetasit Luan Rami ishte dëmtuar nga demonstruesit më 21 janar. Duke marrë shkas nga dëmtimi i makinës, Luan Rami i ka dërguar një mesazh në celular kryetarit të PS, Edi Rama, ku kërkonte dëmshpërblim.

Më pas u pretendua se 37-vjeçari nga Burreli, ka kryer edhe disa telefonata të tjera kërcënuese në adresë të Edi Ramës, duke përmendur edhe planin për t’u përballur me liderin e PS, në demonstratën homazh të 28 janarit. Policia ndërhyri një ditë para demonstratës, duke vënë në pranga tre personat më 27 janar. Ata u lanë në masën e sigurisë “arrest me burg” për një muaj nga Gjykata e Tiranës.

Prokuroria tha se personi i katërt që kërcënoi Ramën, ka pohuar se në momentin e dërgimit të mesazhit nga Luan Rami, katër personat kanë qenë së bashku në një lokal, ku kishin konsumuar pijë alkoolike. I dyshuari i katërt ka mohuar të kishte ndonjë plan konkret për sulm ndaj Ramës. /Telegrafi/