I përjashton Prishtinën dhe Llamkos Kosovën

Enis Zaberxha thotë se Hysi, deri-diku edhe Ferizaj, janë skuadrat favorite për titull, kurse kampionia aktuale e elitës, Prishtina dhe lideri, Llamkos Kosova, nuk kanë gjasa të arrin një sukses të tillë.

Sulmuesi Enis Zaberxha ka thënë se skuadra e Hysit me fitoren ndaj Prishtinës (2-0) në fundjavë ka konfirmuar se është pretendenti kryesor për t’u shpallur kampion në elitën e futbollit kosovar. “Jemi skuadra më e mirë në vend dhe jemi ata që po aplikojmë futbollin më të bukur. Titulli i kampionit është synimi ynë për këtë edicion, të cilën kam besim se do ta arrijmë. Jemi duke luajtur mirë dhe në ndeshjen ndaj Prishtinës treguam se sa të fortë jemi. Thjesht jemi mësuar ta mposhtim Prishtinën”, ka thënë Zaberxha për “Epokën e re”.

I pyetur se Hysi është “ekspert” për ta mposhtur vetëm Prishtinën apo edhe skuadrat e tjera të mëdha, Zaberxha është përgjigjur: “Neve si skuadër nuk na intereson shumë se kënd e kemi kundërshtar, por e luajmë lojën tonë dhe rezultati nuk mungon. Ne kemi potencial ta mposhtim secilën skuadër në Superligë”.

Më pas sulmuesi i skuadrës nga Merdara ka bërë selektimin e skuadrave që mund të shpallen kampione si dhe atyre që nuk kanë gjasa për të arritur deri të ky trofe. Sipas Zaberxhës, Hysi dhe Ferizaj janë dy skuadrat favorite për titull, kurse Prishtina dhe Llamkos Kosova nuk kanë gjasa të shpallen kampione. “Ne dhe Ferizaj jemi favoritët kryesorë për titull. Prishtina dhe Llamkosi nuk kanë gjasa ta bëjnë një gjë të tillë. Prishtina nuk ka fond të mjaftueshëm të futbollistëve, kurse Llamkosi po fiton vetëm si vendës”, ka thënë ai.

Zaberxha në fund ka paralajmëruar se Hysit i duhen disa përforcime gjatë janarit për të qenë skuadër e pamposhtur. Skuadra e Hysit aktualisht renditet në pozitën e dytë me tri pikë më pak se liderja e elitës, Llamkos Kosova dhe tri më shumë se Ferizaj që renditet një pozitë më poshtë. /Epokaere/Telegrafi/