“Hollywoodi është vatër e keqtrajtimit seksual të fëmijëve”

Aktori Elijah Wood, i cili rolin e parë filmik e ka realizuar në moshë tetëvjeçare, ka lëshuar një deklaratë të rëndë duke thënë se Hollywoodi është një vatër e abuzimit të organizuar seksual me fëmijë.

Gjatë një bisede për Sunday Times, ylli i “The Lord of the Rings” ka treguar se kishte qenë i mbrojtur në fëmijëri, sidomos nga nëna e tij, e cila ia kishte ndaluar të shkonte nëpër ndeja ku bashkëmoshatarët e tij ngacmoheshin. Ato përvoja, ai i ka krahasuar me përvojën e abuzuesit seksual, prezantuesit televiziv, Jimmy Savile.

“Të gjithë jemi rritur pranë Savile. Kjo është dëshpëruese. Por, është e qartë se në Hollywood ka ndodhur diçka më e madhe. Gjithçka ka qenë e organizuar. Ka shumë gjarpinj në këtë industri – njerëz të cilëve u intereson vetëm interesi personal”, është shprehur aktori.

Ai ka thënë se krime të tilla vazhdojnë të ndodhin pa u treguar nga viktimat, të cilat nuk flasin për këto gjëra, transmeton Telegrafi.

“Kjo është një tragjedi ndaj përpjekjeve për të gjetur ato çfarë u kanë ndodhur njerëzve të pafajshëm. Viktimat që përpiqen të flasin për këtë ‘shkatërrohen’, ndërsa jeta e tyre dëmtohet pakthyeshëm”, ka shtuar Wood.

Në vitet e fundit janë rritur shumë akuzat ndaj njerëzve në Hollywood për keqtrajtime seksuale. Edhe dokumentari i vitit të kaluar, “An Open Secret”, ofron fakte të ngjashme për keqtrajtimin e fëmijëve në industrinë filmike.

Në vitin 2012, aktori Corey Feldman kishte rrëfyer për frikën që kishte përjetuar në vitet e tetëdhjeta kur kishte qenë i rrethuar nga 15 abuzues, “të cilët si skifterë kishin fluturuar rreth tij”.

Në Hollywood është formuar edhe një grup që i ndihmon fëmijët aktorë të keqtrajtuar e që deri më tani thuhet se i ka ndihmuar 100 viktima. /Telegrafi/