Haziri: Java e fundit e qetë dhe me ulje të lehtë të rasteve pozitive me COVID-19

Komiteti i emergjencave të Komunës së Gjilanit, për parandalimin e pandemisë globale COVID-19, ka vlerësuar se gjendja në 24 orët e fundit është e qetë.

Sipas një njoftimi për media janë shënuar vetëm tre raste pozitive dhe një numër i madh i të shëruarve, mirëpo edhe më tutje është kërkuar respektimi strikt i masave mbrojtëse për të vazhduar me ulje të rasteve positive deri në pikën zero.

Tutje në njoftim thuhet se kryetari i Komunës së Gjilanit, Lutfi Haziri, i cili ka udhëhequr takimin me përfaqësuesit e institucioneve të ndryshme, ka konfirmuar trend të lehtë në rënie me raste pozitive, gjithashtu edhe lehtësime në menaxhimin e situatës nga institucionet shëndetësore, sepse numri i pacientëve me COVID-19 është më i vogël.

“Javën e fundit kemi një trend të uljes së lehtë të rasteve pozitive. Kjo nuk do të thotë se infeksioni nuk është kërcënues siç ka qenë. Gjendja e përgjithshme në Gjilan nga 869 raste pozitive sa kemi të regjistruara që nga 13 marsi, prej tyre 681 janë shëruar plotësisht deri sot, 39 raste kanë vdekur, ndërsa 149 raste janë aktive dhe nën monitorimin e vazhdueshëm nga emergjencat civile dhe mjekët, e prej tyre 44 janë të hospitalizuar dhe me gjendje të qetë në aspektin shëndetësor. Mostra në pritje të rezultateve nga IKSHP janë 55”, ka njoftuar kryetari Haziri.

Ai më tej ka potencuar se në Gjilan, përveç kësaj katër laboratore janë duke i trajtuar rastet me teste serologjike, ndërsa Komuna e Gjilanit është duke koordinuar punën për vendosjen e një aparati në QKMF, ku pesë mijë mostrat e para do të jenë falas për qytetarë që mbulohen nga ana e Komunës, mirëpo pa testin PCR nuk do t’i trajtohen.

Haziri gjithashtu ka bërë të ditur se në fushën e arsimit gjithçka është gati për fillimin e mësimit me datën 14 shtator dhe për këtë janë të gatshëm edhe ekipet e mjekëve që të monitorojnë gjendjen shëndetësore në vazhdimësi, ku do të jenë në vazhdimësi edhe kujdestaritë e këshillit të prindërve dhe nxënësve.

“Kemi të bëjmë me një numër prej rreth 22 mijë nxënës dhe personel arsimor që do të kthehen në shkolla dhe do të jenë masat strikte me qëllimin e vetëm ruajtjen e shëndetit publik. Në çdo shkollë do të jenë ekipet mjekësore, karshi edhe informimit të qartë për respektimin e masave mbrojtëse. Është duke u bërë evidentimi i mësimdhënësve me probleme kronike frymëmarrje, problem me mushkri, zemër, etj, që do të testohen, sepse nuk duam ta rrezikojmë shëndetin e tyre apo edhe të personelit tjetër dhe nxënësve”, ka bërë të ditur ai mes tjerash. /Telegrafi/