Haradinaj: Me ratifikimin e demarkacionit, liberalizimi ka ndodhur

Kryeministri Ramush  Haradinaj,  thotë se liberalizimi i vizave për Kosovën ka  ndodhur me Ratifikimin e Demarkacionit me Malin e Zi.

Në intervistën për emisionin Argument Plus, Haradinaj parashikoi se vendimin final për liberalizim vizash  do të merret më së largu pas 9 muajsh.

Haradinaj, tha se për t’u arritur ratifikimi i demarkacionit me Malin e Zi është gjetur një mes politik mes disa partive.

“Këtu është një respekt, si me thënë është gjetur një mes politik mes PDK-së, mes meje, mes partnerëve tjerë, mes Nismës, mes secilit për ta gjetur një dalje nga kjo gjendje, për t’i ruajtur të drejtat në territor, por edhe për ta zhbllokuar popullin e Kosovës”, tha Haradinaj.

Haradinaj pranoi se ishte në presion të madh emocional teksa ka parë qindra qytetarë të Kosovës që presin me orë të tëra para ambasadave për t’i pajisur me viza. Për këtë kryeministri tha se nuk duhet territori, ndërsa njerëzit me shku dëm.

“T’ju  them sinqertë këtu, unë kam qenë nën presion shumë të madh emocional, qysh me i pa njerëzit në turmë para ambasadave. Unë po e dua tokën, por edhe njerëzit duhet me i dashtë. Se nuk mundesh veç territorin e njerëzit po të shkojnë dëm, pra duhet me i dashtë të dyja”, shtoi ai.

Kryeministri e cilëson si një zgjidhje reale marrëveshjen e arritur për demarkacion, pasi sipas tij tani është mundësia të rikthehet Çakorri e Kulla

“Për fat të mirë mendoj që kjo është një zgjidhje reale që na ruan të drejtën në tokë, nuk është se e kemi nxjerr tokën, përndryshe kufiri ka ra para kësaj dite ku është sot, por mundësitë për me rikthye në Çakorr e Kullë i kemi ruajt me këtë ratifikim edhe në majat e larta. Duhet me i qenë shumë falënderues Malit të Zi për këtë mirëkuptim. Nëse besojmë që jemi në të drejtën tonë, kemi argumente dhe Mali i Zi po ka vullnet me i shqyrtua argumentet tona, nuk e kuptoj pse duhet me shpall të dështuar të drejtën në territor”, përfundoi Haradinaj.