Hajvalia e turpëroi Trepçën ‘89

Skuadra e Hajvalisë ka shënuar fitore kundër Trepçës’89, në ndeshjen hapëse të javës së 20-të në Raiffeisen Superligë.

Në takimin, që u zhvillua, të premten, në stadiumin ‘Riza Lushta’ në Mitrovicë, Hajvalia me rezultat bindës, 4:0, festoi fitoren e tretë me radhë në pranverë.

Hajvalia mbizotëroi plotësisht në këtë ndeshje. Qysh në minutën e 15-të mysafirët kërcënuan seriozisht portën e Arben Beqirit, por Enis Zabërgja ndonëse iu shmang mirë Izmakut brenda zonës në fund gjuajti plogësht pranë shtyllës. Megjithatë, tre minuta më vonë erdhi goli i epërsisë, kur Veton Shabani e befasoi portierin Beqiri me një gjuajtje të furishme nga 20 metra pas një topi të kthyer nga zona e ‘minatorëve’, 0:1.

Në anën tjetër mitrovicasit ishin afër barazimit të shifrave në minutën r 24-t, por gjuajtja e furishme e Drilon Husajt për fat të portierit Faton Maloku e qëlloi tërthorësen. Kur pritej përfundimi i pjesës së parë, në minutën e dytë shtesë, Agron Shabani përfitoi nga reagimi i dobët i mbrojtjes së ‘minatorëve’ dhe me gjuajtje përtokë shënoi golin e dytë të skuadrës së tij.

Në pjesën e dytë, Trepça’89 u vërsul plotësisht në sulm dhe një lojë e tillë krijoi hapësira të mëdha në mbrojtjen e tyre, të cilat i shfrytëzuan mysafirët. Fillimisht në minutën e 50-të Fillim Guraziu përfitoi nga një gabim i mbrojtjes dhe doli i vetëm para portierit Beqiri, për të shënuar golin e tretë, derisa në minutën e 70-të, Festim Krasniqi finalizoi asistimin e Enis Zabërgjës, për të vendosur shifrat përfundimtare, 4:0. /Sporti1/Telegrafi/