Goditje e rëndë për Donald Trumpin – gjykatësi amerikan ia bllokon një prej urdhrave kryesore ekzekutive

Një gjykatës i ka dhënë një goditje të fortë përpjekjes së presidentit amerikan, Donald Trump për të përfunduar shtetësinë me të drejtën e lindjes, duke bllokuar përkohësisht urdhrin ekzekutiv që synon të përfundojë këtë të drejtë.

Gjykatësi ka thënë se ai po tenton të shmangë sundimin e ligjit për të luajtur “lojëra politike” me Kushtetutën, shkruan cnn.

“Ka bërë gjithnjë e më të qartë se për presidentin tonë, sundimi i ligjit është një pengesë për qëllimet politike. Sipas tij, sundimi i ligjit është diçka që duhet shmangur ose thjesht injoruar, qoftë për fitime politike apo personale”, tha gjykatësi i Qarkut të Shteteve të Bashkuara, John Coughenour, gjatë një seance në Seattle. “Në këtë sallë gjykate dhe nën mbikëqyrjen time, sundimi i ligjit është një udhërrëfyes i ndritshëm që unë kam ndërmend ta ndjek”, shtoi ai.

Coughenour vazhdoi se “kushtetuta nuk është diçka me të cilën qeveria mund të luajë lojëra politike. Nëse qeveria dëshiron të ndryshojë dhënien e shtetësisë me të drejtën e lindjes në SHBA, duhet të ndryshojë Kushtetutën vetë”.

Urdhri i ri i përkohshëm i dhënë nga Coughenour zgjeron një bllokim të mëparshëm afatshkurtër që ai kishte dhënë kundër urdhrit të Trumpit disa ditë pas nënshkrimit të tij. Një gjykatës tjetër federal në Maryland gjithashtu dha një urdhër të përkohshëm kundër urdhrit të 78-vjeçarit.

Ky vendim nga gjykatësi i emëruar prej Ronald Reaganit ishte një nga kritikat më të forta deri tani ndaj përpjekjeve të Trumpit që nga dita e parë në detyrë për të përfunduar shtetësinë me të drejtën e lindjes. Urdhri i nënshkruar nga presidenti amerikan u përball me shumë sfida ligjore nga shtetet dhe paditësit privatë.

Vendimi i Coughenour, si dhe ai i ngjashëm i dhënë nga gjykatësja e Qarkut të SHBA, Deborah Boardman, ka të ngjarë të apelohen në gjykatat e apelit federale në San Francisco dhe Richmond, lëvizje që mund ta çojnë çështjen në Gjykatën e Lartë për shqyrtim. /Telegrafi/