Gjuka, trajneri ri i Besës

Fabian Gjuka është trajner i Besës. Trajneri pejan ka pranuar ofertën dhe të hënën ia ka filluar punën. Gjuka thotë se synimi është të mbesin në elitë dhe të mundohen të arrijnë më lartë për Kupë. Ndërkohë, kryetari i klubit, Arbër Elshani, shprehet se Gjuka do t’iu ndihmojë shumë lojtarëve vendorë, derisa organizatori hungarez Bojan Sormaz, nuk e ka vendin e sigurt.

Trajneri Fabian Gjuka do të drejtojë Besën deri në fund të këtij sezoni. Lajmi është konfirmuar nga të dy palët. Ky ndryshim vjen pas largimit të kroatit Boris Kurtoviq i cili kishte shumë oferta dhe skuadra pejane e liroi atë. Por, Besa nuk ka qëndruar duarkryq dhe menjëherë ka gjetur zëvendësimin e tij. Gjuka do të punojë me lojtarët e rinj që është edhe një nga objektivat e klubit.

Fabian Gjuka thotë se Besa ka një ekip të ri dhe me perspektivë. “Besa ka pasur nevojë për mua dhe normalisht se në këto raste nuk duhet shumë kohë për të menduar. Besa ka ekip të ri dhe me perspektivë dhe mund të arrijë shumë. Po e marr skuadrën në një moment jo shumë të përshtatshëm, por nuk i frikësohem këtyre gjërave”, ka thënë Gjuka për ‘Sport Plus’. Ai flet edhe për synimet. “Synimi i parë është mbetja në Ligë, kurse nëse mundemi do të mundohemi të hymë edhe në ‘Final Four’ të Kupës. Për ndryshime tjera do të bisedojmë me krerët e klubit”, u shpreh trajneri pejan.

Gjuka do t’iu ndihmojë të rinjve

Ndërkohë, kryetari i klubit, Arbër Elshani, është i kënaqur me trajnerin e ri. “Gjuka do t’iu ndihmojë shumë basketbollistëve vendorë. Ky është njëri nga prioritet e klubit dhe njëra nga arsyet se pse kemi angazhuar trajnerin e njohur Fabian Gjuka. Ne besojmë në punën e tij dhe mendoj se bashkërisht mund t’ia arrijmë qëllimit”, deklaroi Elshani, duke shtuar: “Siç po shkojnë gjërat Bojan Sormaz mund të largohet nga skuadra, kurse mund të marrim një qendër, pasi për organizator nuk kemi nevojë. Gjithsesi për ndryshime do të vendosim shumë shpejt”, përfundoi Arbër Elshani.

Besa renditet në vendin e gjashtë me 22 pikë, gjashtë fitore dhe dhjetë humbje.

Largohet nga Penza

Fabian Gjuka pasi mori drejtimin e Besës është larguar nga klubi i femrave, ku sezonin e kaluar fitoi Kupën, derisa më parë kishte edhe disa tituj të kampionit. “Unë i kam njoftuar se kam ndërruar skuadër”, u shpreh Gjuka. /SportPlus/Telegrafi/