Gjoci, i sigurt për suksesin e “Fated”

“Më mirë të më mbysje ditën që linda”. Në kohën e ish-Jugosllavisë, një mësues gjatë periudhës sa ishte duke u dhënë mësim nxënësve të tij, ka shpjeguar për Shqipërinë, e me të dëgjuar policia serbe një gjë të tillë, hynë me dhunë në klasë duke thyer derën e në ato momente përjetohet një “tollovi” te nxënësit dhe askush nuk guxon t'i dalë ballë. Ndërkohë, shërbyesi i shkollës heq uniformën dhe e shan shtetin.

Më pas edhe atë e merr policia dhe e dërgon në burg.Maltretimet e të burgosurve janë deri në pikën e fundit. Pas tre ditësh e tre netësh të mbajtur peng në burgun e Goli Otokut, vijnë pasojat e “tredhjes”. Ndodhia bëhet edhe më interesante kur mes dy personazheve lidhet besa për të mos treguar në rrethin e tyre se çfarë u ka ndodhur. Patriotizmi dhe mirësia e shërbyesit ndaj mësuesit shkon deri në dhënien e besës, duke i thënë se “kur të më lindë një vajzë, për të qenë miq të përjetshëm, do ta jap për vëllain tënd”.

Lind vajza dhe “borxhi” kthehet. Syla “noksan”, (Blerim Gjoci) është dhëndri fatlum nga fshati, i cili merr për grua vajzën e Prishtinës, Fatlindën (Teuta Krasniqi). Nusja e rritur në qytet nuk mund të përballojë jetën në fshat, për të cilën bën ankesa të vazhdueshme te babai i saj, ndërsa ai (Bislim Muçaj), i thotë vajzës së tij që nuk mund të shkelë besën e dhënë. Ngjarja është xhiruar në fshatin Kukaj, për pesë ditë nga “The Group/Prishtina Film”, për të “nxjerrë” në dritë filmin e metrazhit të shkurtër “Të lindur pa fat” me regji të Blerim Gjocit, duke trajtuar fenomenin shqiptar të besës, premiera e të cilit u dha të premten mbrëma në hapësirat e Institutit për Mbrojtjen e Monumenteve në Prishtinë.

“Jemi munduar të krijojmë tri personazhe ku në to të paraqesim besën tonë që dikur e kemi pasur, e që tani nuk ka kuptim më. Për personazhet e mia, ajo ka kuptim megjithatë”, ka thënë regjisori Blerim Gjoci. Për gazetën ai tregon se këtë film prej 32 minutave e realizoi për të marrë pjesë në festivalet e ndryshme botërore. “Pres që menjëherë sa të fillojnë konkurset për filma të metrazhit të shkurtër të marr pjesë me filmin e fundit, për të cilin kam pretendime mjaft të mëdha”, ka thënë Gjoci. I gjithë realizimi i filmit “Të lindur pa fat”, ka të bëjë me besën e kombit shqiptar, që për Gjocin është një qëllim dhe kauzë e “frikshme”, ngase sipas tij, në shtetet ku do të prezantohet filmi është e “rrezikshme” të kuptohet lehtë “besa-besë”.

“Janë disa festivale që i kam radhitur dhe që i kam njoftuar për filmin tim, e që jam duke pritur t’i dërgoj”, ka thënë Gjoci. Filmi 23-minutësh do të shkurtohet për 14 minuta në momentin e aplikimit dhe shfaqjes në festivalet ndërkombëtare, kjo sepse sipas Gjocit, të huajt preferojnë filmat e shkurtër me kuptime të mëdha.

“Dua ta shkurtoj edhe pak, edhe pse më ka ‘prishur’ punë kjo gjë, sepse më është dashur disa pjesë shumë interesante t’i largoj. Por edhe me ato që do të largohen filmi nuk do të mbetet i zbrazët, ai ka material të bollshëm”, shton Gjoci. Ai thotë se nuk ka kërkuar donacione edhe pse sipas tij, dy herë më herët kërkesat e tij nuk janë realizuar e kjo ka bërë që ai të mos bëhet “dorështrirë” te ta. “Asnjë film i realizuar nga ana ime nuk është financuar asnjëherë nga institucionet vendore”, shtoi Gjoci. Në profilin e tij të rrjetit social Twitter, atij i ka uruar për filmin Ambasadorja e Shteteve të Bashkuara të Amerikës në Kosovë, Tracey Jacobson.

“Urime Gjocit për premierën e filmit. Shihemi në Oskar”, ka qenë komenti i ambasadores. Fotografia për “Të lindur pa fat”, është mundësuar nga francezi Boubkar Benzabat e ndihmësregjisor është Adhurim Kida. /Telegrafi/Zëri/