“Gjermania dhe Maqedonia arrijnë marrëveshje për njohjen e lejeve të vozitjes”

Marrëveshja dypalëshe mes Maqedonisë dhe Gjermanisë për njohjen e ndërsjellë të lejeve të vozitjes, është arritur, njofton “Deutsche Welle”. Sipas burimeve të njëjta, janë larguar pengesat e fundit dhe me këtë shtetasit e Maqedonisë që jetojnë në Gjermani, lejet e tyre të vozitjes do të mund t’i shfrytëzojnë edhe atje.

Kjo është me rëndësi të veçantë për shtetasit e Maqedonisë, të cilët janë shpërngulur atje, por edhe për ata të cilët udhëtojnë vazhdimisht për në Gjermani, përcjell Telegrafi Maqedoni.

Shtetet nga Ballkani të cilat nuk janë anëtare të BE-së, kanë nënshkruar marrëveshje dypalëshe për rregullimin e kësaj çështje. Serbia dhe Bosnja e Hercegovina një kohë të gjatë kanë pasur marrëveshje të tillë, ndërsa Maqedonia nuk e kishte.

Bisedimet mes ministrive kompetente nga Berlini dhe Shkupi, për rregullimin e çështjes së njohjes së lejeve të vozitjes kanë filluar para një dekade, gjegjësisht në vitin 2007.

Qytetarët e Maqedonisë në Gjermani vitin e kaluar inicuan një peticion online, me qëllim që të përshpejtohet njohja e lejeve të vozitjeve nga shteti gjerman.

Tani mbetet që Ministria e Transportit dhe ajo e Punëve të Brendshme në Maqedoni dhe Ministria e Komunikacionit në Gjermani ta detajizojnë tekstin e marrëveshjes, dhe përfundimisht të nënshkruhet. Nga MPB presin që kjo çështje të mbyllet në takim koordinues, i cili është planifikuar më 19 shkurt./Telegrafi/