Gazetarja ruse lajmërohet pas arrestimit, thotë se “ka ardhur koha të largohet nga shtëpia”

(E plotësuar) Gazetarja ruse Marina Ovsyannikova, e cila tërhoqi vëmendjen globale duke ndërprerë një transmetim të drejtpërdrejtë televiziv për të denoncuar veprimin ushtarak të Rusisë në Ukrainë, thotë se ajo u lirua pas disa orësh në paraburgim pas një proteste të re.

“Une jam në shtëpi. Gjithçka është në rregull”, ka shkruar ajo në Facebook gjatë natës.

“Tani e di që është më mirë të largohem nga shtëpia me pasaportën dhe çantën time”, ka shtuar ajo.

Gazetarja që protestoi në televizionin rus kundër luftës  thuhet se është arrestuar nga policia

Marina Ovsyannikova, ish-gazetarja e Kanalit të Parë Rus, e cila mbajti një poster kundër luftës në transmetim dhe më pas punoi për një kohë të shkurtër për gazetën gjermane Die Welt, thuhet se u arrestua nga policia ruse, sipas avokatit të saj dhe mediave sociale.

Siç shkruajnë mediat e huaja, përcjell Telegrafi, avokati i saj, Dmitri Zakhvatov, konfirmoi arrestimin e saj për agjencinë shtetërore të lajmeve Ria-Novosti.

Por ai tha se nuk e dinte se ku ishte dërguar Ovsyannikova.

“Unë supozoj se kjo është e lidhur në një mënyrë ose në një tjetër me aktin e saj të protestës”, shtoi ai.

“Marina është arrestuar”, shkruan rrethi i saj në llogarinë e gazetares në Telegram. “Nuk ka asnjë informacion se ku është ajo”.

Fotot e saj u postuan në internet, ku shihet se po largohej nga oficerët e policisë me një minibus.

Përkundër këtyre, asnjë deklaratë zyrtare nuk është bërë në lidhje me raportimet për ndalimin e saj.

Ovsyannikova kishte postuar foto të saj me një tabelë ku shkruhej “Putini është një vrasës!” brenda pamjes së Kremlinit.

Por Ovsyannikova u bë e famshme brenda natës në mars kur ndërpreu një transmetim të drejtpërdrejtë televiziv duke mbajtur lart një poster kundër luftës. /Telegrafi/