Forcat ruse mund të kryejnë ‘sulm masiv artilerie’ në Kherson, paralajmëron ish-kreu i ushtrisë britanike

Forcat ruse tani mund të nisin një “sulm masiv artilerie” në Kherson pas tërheqjes nga qyteti strategjik të premten, ka paralajmëruar ish-kreu i Ushtrisë Britanike, gjenerali Lord Richard Dannatt.

Lordi Dannatt i tha Kay Burley-t të Sky-it se situata në qytetin jugor ishte “interesante” dhe se forcat ruse “e kishin humbur atë betejë disa muaj më parë”, përcjell Telegrafi.

Ai tha: “Përpjekja e tyre ishte për të shkuar nga Mariupol përmes Khersonit në Mykolaiv për të marrë Odesan dhe për të kërcënuar Moldavinë – dhe në këtë mënyrë t’ua mohojnë ukrainasve çdo bregdet jugor – që dështoi mjaft kohë më parë”.

Por eksperti ushtarak paralajmëroi se “realiteti” tani ishte se rusët do të përgatisnin pozicione mbrojtëse të njëfarë force në bregun lindor të lumit Dnipro, i cili është në distancë të lehtë të granatimeve të qytetit Kherson.

“Shqetësimi im është se njerëzit në Kherson që janë të kënaqur që janë kthyer do të fillojnë të lëvizin sikur gjërat të ishin kthyer në normalitet. Dhe më pas rusët do të nisin një sulm masiv artilerie”, shtoi ai.

I pyetur nëse presidenti Vladimir Putin duhet të kishte marrë pjesë në samitin e G20 në Bali, Lord Dannatt shtoi: “Ai nuk do të shkonte kurrë. Ai mund të mendojë se është një burrë trim, por nuk do të shkojë të përballet me 19 liderë të tjerë botërorë”. /Telegrafi/