Fillon Festivali i Venecias

Festivali më i vjetër ndërkombëtar i filmit, i cili zhvillohet çdo vit në Venecia të Italisë, ka filluar me shfaqjen e 70 filmave me metrazh të shkurtër, pjesë e një projekti të organizuar me rastin e 70-vjetorit të tij.

Prej datës 28 gusht deri më 7 shtator në Bienalen e Venecias do të shfaqen disa prej realizimeve më të fundit kinematografike, ndër të cilat edhe filmi i shumëpritur “Gravity”, me protagoniste Sandra Bullock dhe George Clooney, i cili me premierën e tij hapi edhe siparin e festivalit.

Ndër 20 filmat të cilët do të jenë në garë për “Luanin e Artë”, dominojnë ata në gjuhën angleze. Veç Clooneyt dhe Bullockut, disa prej aktorëve më në zë në rang botëror, si Judy Dench me filmin “Philomena”, Christoph Waltz dhe Matt Demon me “The Zero Theorem” , Scarlett Johansson në rolin e një jashtëtokësoreje në “Under the Skin”, apo Nicholas Cage me “Joe”, do të jenë pjesë e festivalit.

Mbi 3.000 filma janë parë nga organizatorët në procesin përzgjedhës të evenimentit kinematografik, i cili së bashku me Festivalin e Kanës dhe atë të Berlinit, konsiderohen në treshen më të rëndësishme në rang botëror.

Juria do të kryesohet nga regjisori veteran i kinemasë italiane, Bernardo Bertolucci, i njohur më së shumti për filmin e tij të shumëdiskutuar të vitit 1972, "Tangoja e fundit në Paris" me Marlon Brando dhe Maria Schneider.

Ndër protagonistët e tjerë të festivalit do të jetë ish-sekretari amerikan i Mbrojtjes, Donald Rumsfeld, në dokumentarin "The Unknoën Known" dhe Gianni Amelio për Italinë me "L’intrepido" mbi jetën e një burri të papunë, i cili merr përsipër punët e të tjerëve kur ata duhet të largohen për një periudhë të caktuar.

Interes i veçantë është treguar për filmin "Stray Dogs" të regjisorit nga Tajvani, Tsai Ming-Liang, i cili flet për një baba dhe dy fëmijët e tij të cilët jetojnë në Taipein modern dhe vizitohen nga një grua e çuditshme. /TopChannel/Telegrafi/