FFK organizon ndeshje revyale për nder të 26 vjetorit të pavarësimit të futbollit

Federata e Futbollit e Kosovës për nder të 26 vjetorit të pavarësimit të futbollit të Kosovës, të premten, më 15 shtator, në orën 14:30 në stadiumin e Flamurtarit, do të organizojë ndeshjen revyale ndërmjet Flamurtarit dhe Prishtinës.

Kjo ndeshje zhvillohet tradicionalisht për të shënuar shkëputjen e futbollit të Kosovës nga sistemi i ish-Jugosllavisë, kur pikërisht këto dy skuadra kishin luajtur ndeshjen e parë më 13 shtator të vitit 1991.

Kryetari i Komisionit të Trajnerëve, Ajet Shosholli, i cili në atë kohë kishte qenë trajner i Prishtinës, ka bërë të ditur se janë përkujdesur që edhe në ndeshjen e nesërme rreth 90 për qind e pjesëmarrësve të jenë ata futbollistë që kanë luajtur në ndeshjen e parë të pavarësimit të futbollit të Kosovës.

Kjo ndeshje gjithmonë është zhvilluar më 13 shtator, por sivjet për shkak se në mesjavë ka pasur ndeshje në Vala Superligë dhe Ligën e Parë, është vendosur që ndeshja të luhet më 15 shtator.

Pas ndeshjes për pjesëmarrësit e kësaj  ndeshje do të organizohet edhe një koktej rasti.