Ferizajasi tha se i janë vjedhur paratë që kishte shitur shtatë krerë lopë, Policia e zbulon se raportoi rrejshëm

Drejtoria Rajonale e Policisë në Ferizaj, ka njoftuar se një 74 vjeçar kishte raportuar rrejshëm se atij i janë vjedhur paratë pasi kishte shitur shtatë krerë lopë.

Në njoftim thuhet se sektori Rajonal i Hetimeve nga Drejtoria Rajonale e Policisë në Ferizaj, ka arritur të zbardhë rastin, të raportuar me datën 15.05.2021, si ‘’Vjedhje e rëndë’’.

“Viktima, tashmë i dyshuari I.A ( M/SH/K), 74 vjeçar, kishte lajmëruar në polici, se me datën 15.05.2021 rreth orës 09:30, kishte shitur në tregun e kafshëve në Ferizaj, shtatë ( 7 ) krerë lopë në vlerë të njëmbëdhjetëmijë e katërqindë, ( 11400 euro) dhe se në ditën e njëjtë, rreth orës 15:30, sipas tij këto të holla ju kishin vjedhur në një qendër tregtare në Ferizaj”, thuhet në njoftimin e Policisë.

Tutje, në njoftim thuhet se “gjatë hetimit të këtij rasti, hetuesit policorë kanë arritur që të sigurojnë prova të mjaftueshme materiale dhe deklarative, se i njëjti  nuk kishte pasur lopë fare dhe nuk kishte qenë as në tregun e kafshëve, por që kishte lajmëruar rrejshëm këtë rast, gjë të cilën e ka pranuar në tërësi”.

Me vendim të Prokurorit të Prokurorisë Themelorë në Ferizaj, i dyshuari është liruar në procedurë të rregullt. /Telegrafi/