Express: Nis çmontimi i AKR-së

Grupi Parlamentar i Aleancës Kosova e Re, deri të martën ka numëruar 13 deputetë në Kuvendin e Kosovës – mirëpo që nga kjo ditë ky grup numëron vetëm 11 deputetët. Nga AKR-ja përfundimisht janë larguar deputetët Arsim Rexhepi dhe Driton Tali.

Partia e biznesmenit Behgjet Pacolli, që ishte lajmi kryesor në rezultatet e zgjedhjeve të 17 nëntorit, pasi doli subjekti i tretë më i fuqishëm, sipas të përditshmes Express, ka nisur të “çmontohet”.

Sipas kësaj të përditshmeje, AKR-ja këto ditë po përballet me pakënaqësi të shumta edhe në degët e saj në Kosovë. Madje thuhet se së shpejti pritet të ketë lëvizje edhe në këtë drejtim, sikurse në kryesinë e saj.

Ndryshe për katër muaj të pranisë së saj në Kuvendin e Kosovës, AKR është shquar për konformizmin e saj ndaj Qeverisë së drejtuar nga Hashim Thaçi, vlerëson Express. Lideri i kësaj partie, Behgjet Pacolli, për asnjë moment nuk e ka luajtur rolin e opozitarit. Për më tepër, anëtarë të Kryesisë së tij e akuzojnë atë se ka dëshmuar paaftësi në drejtimin e partisë.

“AKR nuk është parti”, ka thënë deputeti i larguar nga radhët e kësaj partie, Arsim Rexhepi. Sipas tij, aty nuk ka vizion, inovacion, ndërkaq “partia është pa substancë udhëheqëse, pa prijës”.

Nga ana tjetër, në një intervistë për këtë gazetë drejtuesi i AKR-s, Pacolli ka lëshuar akuza të rënda në adresë të ish-vartësve. Ai, Driton Talin e ka akuzuar për paaftësi, ndërkaq Arsim Rexhepin për mashtrim – ngase sipas tij CV-ja e këtij të fundit nuk përputhet me atë që vërtetë është.

“Atij nuk i përgjigjet CV-ja që ka dhënë. Kur kanë ardhur kanë thënë se janë docentë, janë doktorë, kanë përfunduar fakultete jashtë vendit etj. Kjo nuk është e vërtetë”, ka thënë Pacolli.

Ai po ashtu ka thënë se AKR-ja mirëpret dhe përkrah largimin e tyre nga partia, e në fakt, AKR-ja nuk i ka larguar ata por ata janë larguar nga ajo. /telegrafi/