Lajme Kosovë

Erdogan, me video link, uron inaugurimin e xhamisë së Emin Pashës në Prizren

Para 9 vitesh

Ministri i Mjedisit dhe Planifikimit Hapësinor, Ferid Agani, ka marrë pjesë në inaugurimin e xhamisë së Emin Pashës në Prizren, e cila është restuaruar me financimin e Agjencisë Turke për Zhvillim dhe Bashkëpunim Ndërkombëtar (TIKA).

Agani, i cili është dhe kryetar i Partisë së Drejtësisë, në fjalën e tij tha se kjo është një ditë e madhe për qytetarët e Prizrenit dhe të gjithë Kosovës, sepse po ripërtërihet njëri prej monumenteve shumë të rëndësishme të qytetit më te lashtë të Kosovës – xhamia e Emin Pashës.

“Ngjarja ka rëndësi të shumëfishtë. Po e theksoj vetëm dy dimensione të veçanta të kësaj. E para është se kemi të bëjmë me ruajtjen dhe zgjatjen e qëndrueshmërisë ndaj kohës të njërit prej simboleve kulturore të Prizreni, i cili tash e tutje do t’iu shërbejë gjeneratave të ardhshme si faltore ndaj zotit të madhërishëm, por edhe si përkujtues i historisë sonë të begatshme kulturore”.

“Dimensioni i dytë është se realizimi i këtij misioni të ndershëm është bërë nga shteti dhe populli mik i Turqisë si shenjë e fuqizimit të mëtutjeshëm të marrëdhënieve të ndërsjella vëllazërore në dekadat dhe shekujt e kaluar. Dy dimensionet e këtij projekti kanë rëndësi të veçantë”, tha ai.

Pjesë e inaugurimit ishte edhe presidenti i Turqisë, Recep Tayyip Erdogan, i cili është lidhur nëpërmjet video-lidhjes nga Ankaraja.

Erdogan ka uruar për inaugurimin e kësaj xhamie. Ai, gjithashtu ka thënë se Turqia do të vazhdojë ta mbështesë Kosovën në të gjitha aspektet.

Të pranishëm në këtë inaugurim ishin dhe kryetari i Bashkësisë Islame të Kosovës, Naim Tërnava, dhe ambasadorja e Turqisë në Kosovë, Kivilcim Kiliç.

Me këtë rast, ministri Agani ka shfrytëzuar rastin dhe ka shprehur ngushëllimet për jetët e humbura në sulmet e fundit terroriste në Turqi.

Restaurimi i xhamisë së Emin Pashës kishte nisur në vitin 2014. Restaurimi i tërësishëm i objektit të xhamisë, si në pjesën e jashtme ashtu dhe enterieri, sikurse dhe sipërfaqja e saj rrethuese së bashku me oborrin, është kryer me mbështetjen financiare të TIKA-s, në koordinim me Këshillin e Bashkësisë Islame të Prizrenit.

Sipas ekspertëve, punimet janë kryer në mënyrë profesionale, me ç’rast janë ruajtur në tërësi veçoritë karakteristike materiale nga trashëgimia kulturore osmane-islame e saj.

Xhamia e Emin Pashës daton nga shekulli XIX. Ajo është ndërtuar në vitin 1831 nga ana e Mehmed Emin Pashës. Mbi derën hyrëse të saj qëndron mbishkrimi në të cilin tregohet se “Kjo godinë është ngritur nga prizrenasi Mehmed Emin Pasha, i biri i Tahir Pashës”.

Veçoria kryesore e kësaj xhamie është se përveç kubes (kupolës) kryesore i ka edhe tri kube të vogla dhe është kopje në miniaturë e planit projektues të xhamisë së njohur të Sinan Pashës. Xhamia e Emin Pashës çmohet përveç tjera edhe për bukuritë e brendshme të shumta të muraleve dhe dekorimeve orientale, si dhe të artit të saj të ashtu quajtur “natyrë e vdekur”.

Emin Pasha vdiq në vitin 1843, gjersa gjendej në pozitën e mytesarifit (sanxhakbeut) të Prizrenit. Ai u varros në oborrin e xhamisë. Mbishkrimi i nishanit të varrit të tij, po ashtu është një vepër e jashtëzakonshme artistike, i ndërtuar nga mermeri i sjellë në atë kohë nga Shkupi. /Telegrafi/