“Erdogan ra në përqafim të Putinit”

Hapat e fundit të Ankarasë në lidhje me projektet e përbashkëta me NATO-n, dërgojnë në krizë serioze Aleancën Veri-Atlantike, ka deklaruar ish-udhëheqësi i shërbimit informativ ushtarak dhe ekspert për Lindje të Afërme, gjenerali Frantishek Shtepanek.

Turqia ka bllokuar realizimin e disa programeve ushtarake të bashkëpunimit pas disa skandaleve të fundit diplomatike ndërmjet Ankarasë dhe vendeve të BE-së.

NATO më vonë ka bërë të ditur se këta hapa të Turqisë kanë të bëjnë vetëm për Austrinë, e cila nuk është pjesë e Aleancës, por është partner i saj.

Sipas pohimeve të gazetës çeke “Aktualnje”, Ushtria turke nuk do të marrë pjesë në aktivitetet e NATO-s, në të cilat është planifikuar edhe pjesëmarrja e ushtarëve austriakë, transmeton KosovaPress.

Një sjellje e tillë e Ankarasë mund të krijojë probleme, para se gjithash në punën e misionit të NATO-s në Kosovë dhe Afganistan.

“Bëhet fjalë për krizën më serioze në NATO”, ka deklaruar Shtepanek.

Ai konsideron se kjo nuk do të çojë deri te ndërprerja e plotë se bashkëpunimit ndërmjet Turqisë dhe NATO-s, të paktën jo për një kohë të shkurtër.

“NATO ka rol të madh në mbrojtjen e Turqisë. Të njëjtin rol e luan edhe Turqia për Aleancën. Aty janë një milion ushtarë, të cilët qëndrojnë në kufijtë e NATO-s, si dhe në kufi me rajonet ku ka kriza aktuale ose potenciale”, tha Shtepanek.

Sipas tij, presidenti turk Recep Tayip Erdogan po bën presion mbi NATO-n për të ndërtuar një imazh të fuqishëm dhe për t’u dëshmuar si lider i vendosur para popullit të tij, gjë e cila duket se i nevojitet në prag të referendumit për shtimin e kompetencave si president.

“Përkujtojmë krizën e kaluar në raportet turko-ruse, pasi aeroplani turk rrëzoi bombarduesin rus. Sot, megjithatë, Erdogan vetëm sa nuk ka ra në përqafim të presidentit rus Vladimir Putin. Erdogan bën gjithçka që mundet për të përforcuar autoritetin dhe pushtetin e vet. Ai është vendosur në rrugën e diktatorit”, konsideron Shtepanek.

Ai konsideron se nëse referendumi i ardhshëm do t’i sjellë sukses Erdoganit, NATO duhet të tregohet e kujdesshme, pasi presidenti turk, nëse shton fuqinë e tij, do të mund të merrej me çështjen se në cilin drejtim do të shkojë tutje vendi i tij.

“Sipas skenarit më të keq, Turqia do të mund të zgjidhte çështjen nëse do të jetë anëtare e NATO-s ose aleat i afërt i Rusisë”, tha Shtepanek.