Ekspozitë e veçantë në New York

Ekspozimi anatomik i një kali me kalorësin po tërheq këto ditë vëmendjen e njerëzve në New York. Vepra e quajtur “Kalë që galopon me kalorësin” është vendosur në Times Square për t’u parë nga publiku.

Mjeku dhe anatomisti gjerman Gunther von Hagens është autori i statujës. Ajo bën pjesë në grupin e ekspozitës së trupave “Body Worlds” (“Botë trupash”) që janë përherë të pranishme në Galerinë Lindore të Times Square.

“U deshën tre vjet dhe rreth 20 njerëz për fragmentimin e trupave. Kjo është vepra ime më e madhe dhe jam i lumtur që kjo shënon edhe fillimin e një mjedisi të përhershëm për ‘Botën e trupave’”, ka deklaruar autori.

Von Hagens e krijoi skulpturën “Kalë që galopon me kalorësin” përmes procesit të plastinimit, një metodë që ai e zbuloi për herë të parë në vitin 1977. Ajo zëvendëson lëngjet dhe dhjamet e trupit me material plastik. Plastinimi lejon vendosjen e materialit plastik në pozicione të ndryshme të trupave. Anatomisti e mori frymëzimin për veprën e tij nga skulptura e papërfunduar në bronz e Leonardo Da Vincit.

“Jam ende duke studiuar për teknikën e plastinimit. Tani nuk jam duke punuar për një vepër tjetër. Kjo është e fundit. Tani i kam dhënë rol udhëheqës në këtë punë djalit tim, me objektiv paraqitjen në ekspozita. Vetë jam duke zhvilluar kërkime të mëtejshme në teknikën e plastinimin për universitetet dhe për t’ua mësuar më mirë studentëve”, ka thënë ai.

Ekspozimi, që paraqet strukturën anatomike të kafshës dhe njeriut, i ka lënë pa mend shikuesit. “Të shohësh strukturën anatomike të trupit njerëzor, fragmentimin e pjesëve të ndryshme të trupit është diçka e jashtëzakonshme. Dhe të gjitha këto i sheh në pozicion lëvizjeje, një gjë shumë e bukur. Kjo është edhe një mënyrë për t’i mësuar fëmijëve anatominë, pa ndier frikë”.

Nga të gjitha punimet që ka bërë deri më sot me teknikën e plastinimit, “Kalë që galopon me kalorësin” është vepra më e njohur e Von Hagensit. Ajo do të mbetet një burim magjepsjeje për spektatorët e eskpozicionit “Botë trupash”, që i bën një paraqitje të hollësishme strukturës anatomike trupit të njerëzve edhe pjesëve të tij. /VoA/Telegrafi/