Edhe pse ende nuk dihet nëse do të vijë, serbët në veri përgatiten për vizitën e Vuçiqit (Foto)

Siç edhe tashmë është thënë, presidenti i Serbisë, Aleksandar Vuçiq do të vendosë sot nëse do të realizojë vizitën e tij të paralajmëruar në Kosovë.

Megjithatë, sipas mediave serbe, përcjell Telegrafi, një ditë para vizitës së presidentit të Serbisë, Aleksandar Vuçiq në Kosovë, serbët në veri të Mitrovicës presin që presidenti i Serbisë të vizitojë Kosovën.

Gjithashtu, sipas tyre, një pjesën veriore të Mitrovicës, edhe prania e policëve në rrugë është e rritur.

Ndërkohë mediat kanë publikuar disa fotografi në të cilat shihet se si billbordat janë të mbuluar me fotografi të Vuçiqit.

Përkundër paralajmërimeve, presidenti serb Aleksandar Vuçiq ka vendosur të mos diskutojë me përfaqësuesit e Prishtinës në Bruksel.

Këtë gjë e ka bërë të ditur drejtori i të ashtuquajturës Zyrë për Kosovën, Marko Gjuriq, gjatë një konference për media në Bruksel.

“Presidenti vendosi ta bëjë këtë”, tha Gjuriç, “për shkak të mashtrimeve, kërcënimeve dhe gënjeshtrave të shqiptarëve të Kosovës”.

I pyetur nëse Presidenti i Serbisë kishte frikë nga ndonjë arrestim në Kosovë, Gjuriç u përgjigj se nuk ka frikë dhe se nëse ai vendosi të shkonte në Kosovë, ai sigurisht nuk do të arrestohej.

Për anulimin e takimit gjithashtu kanë raportuar edhe mediat serbe, sipas të cilave deri më tani nuk është e qartë nëse bisedimet ndërmjet Kosovës dhe Serbisë do të vazhdojnë dhe kur. /Telegrafi/