Drita përgatitet në Turqi

KF Drita nga Gjilani në muajin shkurt do të udhëtojë për në Bursa të Turqisë, ku do të kryejë një fazë përgatitore, kurse në pranverë beson në një paraqitje të suksesshme me të vetmin synim, triumfin në garat e Kupës së Kosovës, që i mungon këtij qyteti qe 13 vite të plota. Derisa stafit teknik dhe lojtarëve deri në një afat të pacaktuar i është ndaluar prononcimi për media, lajmin për shkuarjen në Turqi e kanë bërë vetë krerët e ekipit gjilanas.

“Në skuadër kemi lojtarë vërtet cilësorë, të cilët kanë premtuar se do të japin më të mirën e tyre, në mënyrë që skuadra të arrijë objektivat e këtij sezoni. Nuk kemi tendenca që të ndjekim titullin, e kjo do të thotë se objektivi ynë është kupa e Kosovës. Po përpiqemi të formojmë një grup të denjë, i cili të jetë i aftë për të përballuar me sukses të gjitha sfidat në sezonin pranveror”, ka thënë nënkryetari i Bordit të KF Drita, Besim Ismaili.

E kryetari i ekipit gjilanas, Saqip Shala ka thënë se ka ardhur koha që trofeu u kupës të kthehet në qytetin e Gjilanit. “Ka ardhur koha që në Gjilan ta kthejmë trofeun e kupës së Kosovës. Si qytet i futbollit Gjilani gjithnjë meriton trofe”, tha kryetari Shala. Herën e fundit Drita ishte fituese e kupës së Kosovës në vitin 2001. Drita pjesën vjeshtore të Superligës së Kosovës e ka mbyllur në pozitën e 6-të me 26 pikë të grumbulluara, 11 më pak sesa lideri Llamkos Kosova. /Zëri/Telegrafi/